बेनी । म्याग्दीको सदरमुकाम बेनी बजारमा खानेपानी आपुर्ति गर्ने आयोजनाको क्षमता बढाउन लागिएको छ ।
संघीय खानेपानी तथा ढल ब्यवस्थापन कार्यालय म्याग्दीको सहयोगमा बेनी खानेपानी उपभोक्ता संस्थाले क्षमता बिस्तारका लागि नयाँ टंकी निर्माण गर्न लागेको हो । संस्थाका अध्यक्ष माधवप्रसाद रेग्मीले बेनी बजारमा खानेपानी आपुर्तिलाई सहज बनाउन क्षमता बढाउन लागिएको बताउनुभयो ।
“कार्यालयको रु. ४५ लाख सहयोगमा दुई लाख लिटर क्षमताको टंकी बनाउने काम भैरहेको छ,” उहाँले भन्नुभयो “कोरोना भाइरस संक्रमणको जोखिम र निषेधाज्ञाको असहज अवस्थाका बावजुद निर्माण सामग्री जुटाएर स्वास्थ्य सुरक्षा मापदण्ड अपनाई मजदुर परिचालन गरि टंकी निर्माण कार्यलाई निरन्तरता दिएका छौ ।”
नयाँ टंकीको फेरो ढलानको काम सकिएको छ । पर्खाल र ढकनी ढलान जेठ महिनाभित्रनै ढलान गरिसक्ने लक्ष्य छ । एक लाख लिटर क्षमताको टंकी गत वर्खामा चुहावट भएपछि त्यसलाई भत्काएर सोही ठाउँमा नयाँ टंकी बनाउन लागिएको हो ।
आयोजनाको हाल एक लाख लिटर क्षमताको एक वटा र दुई लाख लिटर क्षमताको एक वटा रिजर्भ टंकी छ । नयाँ टंकीमा पानी संकलन गरेर बजारभित्र बितरण गर्ने योजना छ । प्रतिसेकेण्ड तीस लिटर खानेपानी आपुर्ति गर्ने क्षमता भएको बेनी खानेपानी आयोजनाले हाल प्रतिसेकेण्ड २२ लिटर आपुर्ति गर्दै आएको संस्थाका प्रबन्धक यामबहादुर बिश्वकर्माले बताउनुभयो ।
भकिम्लीको कोप्रे र राम्चेको पुम्दीखोलाको मुहानबाट पानी ल्याएर बितरण गरिदै आएको छ । आयोजना मार्फत बेनी बजारका एक हजार सात घरधुरी उपभोक्तालाई निजी धाराबाट खानेपानी बितरण हुदै आएको छ ।
खडेरी, मुहान सुक्दा, पाईप फुटेको, पहिरोका कारण पुम्दीको मुहानबाट खानेपानी आपुर्ति बन्द हुन्छ । नयाँ टंकीमा पानी भण्डारण गरेर राख्न सकेमा आपुर्ति नभएको अवस्थामा पनि सहज रुपमा पानी वितरण गर्न सकिने जनाइएको छ ।
