बेनी, ः क्षमता भन्दा बढी तौलका मालबाहक गाडी गुडाउदा बेनी–जोमसोम–कोरला सडकका बेलिब्रिज जोखिममा परेका छन् ।
बढी तौलका गाडी गुडाउँदा बेलिब्रिज जिर्ण बन्नुका साथै दुर्घटना हुने जोखिम बढेको हो । बेलिब्रिजहरुमा क्षति हुँदा अन्तरदेशीय ब्यापारिक कोरला नाका जोड्ने सडकमा यातायात ठप्प हुन्छ ।
बेनी–जोमसोम सडक अन्तर्गत म्याग्दीको अन्नपूर्ण गाउँपालिका–२ भुरुङ्ग खोला, वडा नम्बर ३ दानाको रुप्सेखोला, बेनी र पर्वतको बगरफाँटको सिमाना कालीगण्डकी, मुस्ताङको कोवाङ, बोक्सी र टुकुचेको थापाखोलामा बेलिब्रिज छन् ।
ती बेलिब्रिजहरुको भार बहन क्षमता अधिकतम १८ मेट्रिक्टन छ । एक पटकमा एक वटा मात्र सवारी साधन तार्न मिल्छ । निर्माण र खाद्य सामग्री बोकेका १८ मेट्रिक्टन भन्दा बढी तौल भएका ट्रक, ट्रिपर, लरी, टेलर बेलिब्रिजबाट तारिदाँ भाचिने र भत्किने जोखिम भएको हो ।
जिल्ला ट्राफिक प्रहरी कार्यालय म्याग्दीका प्रमुख राजकुमार केसीले क्षमता भन्दा बढी तौलका सवारी साधनहरु बेलिब्रिजबाट गुडाउदाँ दुर्घटनाको जोखिम बढेकाले निगरानी थालिएको जानकारी दिनुभयो ।
“भार थाम्न नसकेर बेलिब्रिज भाचिने र भत्किने जोखिम बढेपछि केही दिनदेखि म्याग्दीबाट मुस्ताङ जाने सवारी साधनलाई पोखरेबगर र मुस्ताङबाट बेनीतर्फ आउने बेलिब्रिजको क्षमता भन्दा बढी तौलका सवारी साधनलाई जोमसोम रोक्न थालेका छौ,” उहाँले भन्नुभयो “बढी तौलका सामान झारेर हलुका बनाउन र पोल्ट्रि गर्न लगाएका छौ ।”
स्तरोन्नतिको क्रममा रहेको बेनी–जोमसोम–कोरला सडकका पक्कि पुल निर्माण नभएका ठाउँमा अस्थायी रुपमा सवारी साधन आवत जावतका लागि बेलिब्रिज जडान गरिएको छ । बेनी–जोमसोम–कोरला सडक आयोजनाले बेलिब्रिजहरुमा क्षमता भन्दा बढी तौलका गाडी नगुडाउन सूचना बोर्ड राखिएको जनाएको छ ।
