बेनी, बेनी–जोमसोम सडक अन्तर्गत म्याग्दीको रघुगंगा गाउँपालिका–२ सिरुबारीमा मंगलबार दिउँसो पहिरोबाट खसेको ढुङ्गाले बस च्यापिदा २ जना यात्रु घाइते भएका छन् ।
पोखरा देखि बेनी हुदै जोमसोम तर्फ जादै गरेको ग १ ख ७७१७ नम्बरको बस गुडिरहेको अवस्थामा कुना तर्फबाट ठूलो ढुङ्गा खसेर च्यापिएको जिल्ला प्रहरी कार्यालय म्याग्दीले जनाएको छ ।
घाइते बेनी नगरपालिका–४ सिंगाकी २१ वर्षीया पुजा खड्का र गुल्मीको इस्मा गाउँपालिका–२ की ३१ वर्षीया मिना नेपालीलाई उद्धार गरेर उपचारका लागि बेनी अस्पताल ल्याउदै गरिएको जिल्ला प्रहरी कार्यालयका प्रहरी निरीक्षक राजन रायमाझीले बताउनुभयो ।
मिनाको टाउको र ढाडमा चोट लागेको छ । पुजाको अवस्था सामान्य छ । पहिरोमा बस खड्कीएपछि बेनी–जोमसोम सडक अवरुद्ध बनेको छ । सिरुवारीको करिब १५० मिटर दुरीको सडकमा १ किलोमिटर माथिबाट पहिरो खसिरहने गर्छ ।
सिरुवारीको पहिरोले यातायात सञ्चालनमा अवरोध सिर्जना गर्नुका साथै दुर्घटनाको जोखिम बढेको छ । बेनी–जोमसोम–कोरला सडक आयोजनाले सडक विभागको डोजर परिचालन गरेर पहिरोमा फसेको गाडी तान्ने र सडक खुलाउने काम भैरहेको जनाएको छ । बेनीबाट जोमसोमतर्फ र जोमसोम देखि बेनी आउदै गरेका सवारी साधनहरु बीच बाटोमै रोकिएका छन् ।
