बेनी, म्याग्दीको धवलागिरी गाउँपालिका–६ मराङको वेशीका लाल केसीको आगनमा खानेपानीको धारा निर्माण भएको तीन वर्ष भयो । केसीका परिवारलाई खानेपानीका लागि सार्वजनिक धारामा धाउनुपर्ने बाध्यता अझै हटेको छैन् ।
‘आगनमा धारा बनेको तीन वर्ष पुगीसक्दा समेत पानी आएको छैन,’ उनले भने ‘पानीका लागि सार्वजनिक धारा र मुहानकै भर पर्नु परेको छ ।’ केसी मात्र नभएर वेशी, कुम्री, राम्रे र ठूलोगाउँका बासिन्दाको आगनमा धारा निर्माण भएपनि पानी आएको छैन् ।
वि.स. २०७८ मा शुरु भएको मराङ एक घर एक धारा खानेपानी आयोजना निर्माण पुरा नहुँदा आगनकै धारामा सफा, स्वच्छ खानेपानी उपभोग गर्ने स्थानीयबासीको सपना अधुरै बनेको हो । धवलागिरी गाउँपालिका–६ मराङका वडा अध्यक्ष राजाराम सुवेदीले निर्माण व्यवसायीका कारण खानेपानी आयोजना निर्माणमा ढिलाई भएको बताए ।
‘तीन वर्षअघिनै सम्पन्न हुनुपर्ने आयोजनाको धारा र टंकी निर्माण भएपनि इन्टक, मुख्य र वितरण लाइन बनाउन ढिलाई भएको छ,’ उनले भने ‘छिटो काम गराउन निर्माण व्यवसायीलाई ताकेता गरिरहेका छौ ।’ निर्माण व्यवसायीले पर्याप्त मजदुर परिचालन र निर्माण सामग्री व्यवस्थापन नगरेकाले योजनामा ढिलाई भएको हो ।
गाउँपालिकाका प्राविधिक शाखाका प्रमुख लोकेन्द्र रावलका अनुसार ९७ घरमा निजी धारा निर्माण गरेर खानेपानी वितरण गर्न वि.स. २०७८ पुष २७ गते सुन्दर निर्माण सेवा सँग १ करोड १३ लाख ४९ हजार २५ रुपैयाँ मा ठेक्का सम्झौता भएको थियो ।
हालसम्म ३३ लाख ५३ हजार रुपैयाँ खर्च भएको योजनाको म्याद आगामी २०८१ असार २५ गतेसम्म थपिएको छ । हालसम्म ७२ वटा धारा निर्माण सकिएको छ । वेशी, कुम्रि र ठुलोगाउँमा पानी संकलन गर्ने टंकी निर्माण भएको छ । राम्चेमा टंकी निर्माणाधिन छ ।
यहाँका बासिन्दाले पञ्चायतकालमा निर्माण भएको संरचनाबाट खानेपानी उपभोग गरिरहेका छन् । धारामा पर्याप्त र नियमित पानी नआउँदा मुहान र खोल्साको पानी उपभोग गर्नुपर्ने बाध्यता छ । पुरानो आयोजना जिर्ण भएपछि नयाँ योजना निर्माण गर्न थालिएको थियो ।
निर्माण व्यवसायी रामचन्द्र कार्कीले चालु आर्थिक वर्षभित्रनै मराङको खानेपानी योजना सम्पन्न गर्ने बताए । भौगोलिक विकटता र विपद्का कारण ढिलाई भएको उनले बताए । गाउँपालिकाका अध्यक्ष प्रेमप्रसाद पुनले सो खानेपानी आयोजना सम्पन्न गराउन चालु आर्थिक वर्षमा ७९ लाख रुपैयाँ बजेट बिनियोजन गरेको बताए ।
