बादुक, म्याग्दीको रघुगंगा गाउँपालिका–१ वादुकका गोपाल खड्काथोकीले विदेशमा रहेका आफन्त देखि छिमेकीहरुलाई भिडियो कलबाट सूचना आदानप्रदान र कुराकानी गर्न थाल्नुभएको छ ।
सोही गाउँका ६० वर्षीय चुकबहादुर शेरपुञ्जाले पनि एनड्रोइड फोन र इन्टरनेटको सुविधा भएपछि सूचना आदानप्रदानको परम्परागत शैली परिवर्तन गर्नुभएको छ । “गाउँमा सूचना प्रवाह गर्नुपर्दा पहिले कटुवाललाई घोक हाल्न (चिच्याउन) लगाउने चलन थियो,” बादुकको श्रीकृष्ण आधारभूत विद्यालय व्यवस्थापन समितिका अध्यक्ष समेत रहेका शेरपुञ्जाले भन्नुभयो “अहिले फेसबुकको ग्रुप र पेजमा सूचना राख्ने गरिएको छ ।”
इन्टरनेट भएपछि सस्तो र सजिलो रुपमा देश विदेशमा रहेका आफन्त, साथीभाईसँग कुराकानी र सूचना आदानप्रदान गर्न पाएको खड्काथोकीले बताउनुभयो । “हामी सानो हुदाँ विदेशबाट म घर आउदैछु भनेर चिठी पठाउने व्यक्ति एक महिनामा चिठी भन्दा पहिले घर आइपुग्ने अवस्था थियो,” उहाँले भन्नुभयो “अहिले विश्वको जुनकुनै ठाउँमा भएकालाई पनि भिडियो कलमा अनुहार हेरेर कुराकानी गर्न पाइएको छ ।”
वादुकका बासिन्दाले सामुहिक रुपमा सबै घरमा इन्टरनेट जडान गरी प्रविधिमैत्री गाउँ बनाउने अभियान चलाएपछि सुचना आदानप्रदानको शैली फेरिएको हो । स्वदेश तथा विदेशमा रहेका बादुकबासीहरुले करिब रु. आठ लाख जुटाएर इच्छुक ५० वटा घरमा इन्टरनेट जडान गरिएको स्थानीय लोकेन्द्र गर्बुजाले बताउनुभयो ।
“वादुकका दुई तिन वटा बाहेक सबै घरमा सामुहिक रुपमा इन्टरनेट जडान भएको छ,” उहाँले भन्नुभयो “अर्मपर्म, भेला, बैठक देखि बिवाह, छेवारको निम्ता गर्न पनि फेसबुक च्याट ग्रुप र पेजलाई प्रयोग गरेका छौ ।” बादुकमा जन्मिएर हाल बेलायतमा बसोबास गर्नुहुने अर्जुन तिलिजाको अगुवाईमा ‘बेगखोला न्युज’ नामको फेसबुक पेज सञ्चालन भएको छ ।
सो पेजमा बेगखोलामा हुने हरेक गतिबिधिको सूचना राखिन्छ । कुनै विषयमा बहस र छलफल हुन्छ । विकास निर्माण र सामाजिक कामको लागि सुझाव संकलन गर्न तथा भएका गतिबिधिको प्रचारप्रसार गर्न सोही फेसबुक पेजको प्रयोग गरिएको वडा अध्यक्ष बिलबहादुर फगामीले बताउनुभयो ।
वादुकमा इन्टरनेट जडानका लागि संकलित रकम मध्य तार, राउटर र जडान खर्चबाट बचेको रु. एक लाख पचास हजारको कोषमा राखिएको छ । प्रतिघर रु. दुई हजार आठ सय शूल्क तिरेर इन्टरनेट जडान गरेका थिए । मासिक रु. ७५० शूल्क उठाउने गरिएको वादुक इन्टरनेट अभियानका नगेन्द्र गर्बुजाले बताउनुभयो ।
समाचारका लागि सञ्चार माध्यममको अनलाइन, फेज र युट्युव च्यानलबाट समाचार सुन्ने, हेर्ने र पढ्ने गर्दछन् । युट्युवमा आफूलाई मन पर्ने गित, चलचित्र हेरेर जेष्ठ नागरिकले रमाइलो गर्दछन् ।
