बेनी, । म्याग्दीको मंगला गाउँपालिकाको वडा नम्बर २ सहश्रधारा र वडा नम्बर ५ को कुरसिम्ला जोड्ने झोलुङ्गे पुल निर्माण भएपछि एक घण्टाको बाटो पन्ध्र मिनेटमा छोटिएको छ ।
संघीय सरकारको ससपेन्सन ब्रिज डिभिजनले सहश्रधारा र कुर्सीम्ला जोड्ने म्याग्दी नदीमाथी दुई सय मिटर लामो झोलुङ्गे पुल निर्माण गरेको हो । मंगला–२ सहश्रधाराका श्रीराम पौडेलले पुल निर्माण भएपछि एक घण्टाको यात्राअवधी पन्ध्र मिनेटमा छोटिएको बताउनुभयो ।
“सहश्रधारा, कुर्सिम्ला, रणवाङ, पिपलबोट, छिस्वाङ, टिकावाङ, पाखु, धारा, दुखुबेसी, नयाँबजार, अर्मनका सात सय घरधुरीका पाँच हजार जनसंख्या लाभान्वित भएका छन,” उहाँले भन्नुभयो “घुमाउरो बाटो हिड्नुपर्ने बाध्यता हटेको छ ।”
सहश्रधारा र कुर्सीम्ला वारपार गर्न यसअघि पिपलबोट र रातोढुंगा पुगेर घुमाउरो बाटो प्रयोग गर्दा एक घण्टा लाग्ने गरेको थियो । पुल नहुँदा सहश्रधारा, दुखुबेसी, नयाँ बजारका सारदा मावि छिस्वाङमा पर्ने विद्यार्थीहरुलाई घुमाउरो बाटो हिड्नुपर्ने समस्या थियो ।
रु. ७३ लाख ४३ हजारमा ठेक्का सम्झौता गरेको निर्माण कम्पनी जेके जिवन अपर तामाकोशीले पुल निर्माण सम्पन्न गरेपछि आवत जावत गर्न थालिएको छ । स्थानीयबासीले ससपेन्सन ब्रिज डिभिजनका कर्मचारी, निर्माण कम्पनीका प्रतिनिधि र जग्गादातालाई अविर जात्रा र फुलमाला लगाएर आइतबार सम्मान गरेका थिए । पुल निर्माण भएपछि स्थानीयबासीमा खुुसीयाली छाएको मंगला–५ अर्मनका वडा अध्यक्ष भुपेन्द्र खत्रीले बताउनुभयो ।
