बेनी, । आगामी असोज ४ र ५ गते बेनीमा हुन लागेको नेपाल जेसीजको क्षेत्र (ख) सम्मेलनको तयारीका लागि निर्देशक समिति गठन भएको छ ।
म्याग्दी जेसीजको आतिथ्यतामा हुन लागेको सम्मेलनका लागि पुर्व शाखा अध्यक्ष सुविन श्रेष्ठलाई सम्मेलन निर्देशक चयन गरिएको हो । सम्मेलनको उपनिर्देशकहरुमा पूर्व अध्यक्षहरु क्रमश ः विनय श्रेष्ठ, नवराज पौडेल, खम थापामगर र सुजन बरुवाल चयन हुनुभएको म्याग्दी जेसिजका शाखा अध्यक्ष सुमन बानियाले जानकारी दिनुभयो ।
यसैगरी निर्देशक श्रेष्ठको संयोजकत्वमा १५ सदस्यीय सम्मेलन कार्य सम्पादन समिति गठन भएको छ । म्याग्दी जेसीज बर्ष २०२३ को साधारणसभाले बेनीमा नेपाल जेसीजको क्षेत्र (ख) सम्मेलन आयोजना गर्ने निर्णय गरेको थियो ।
यसअघि सन २००७ मा पनि बेनीमा नेपाल जेसीजको क्षेत्र (ख) सम्मेलन भएको थियो । म्याग्दी जेसीजको स्थापना भएको २५ वर्ष पुगेको अवसरमा सम्मेलन आयोजना गर्ने प्रस्ताव गरिएको थियो ।
सम्मेलनमा ४१ वटा शाखाका प्रतिनिधि र नेपाल भर रहेका १७८ वटा शाखाबाट पर्यवेक्षक गरि ६०० जना सहभागि हुने अनुमान गरिएको छ । नेपालमा जेसीजका ४ वटा क्षेत्र छन् । सम्मेलनमा आउने सहभागिहरुलाई निर्देशक समितिले आतिथ्यता, आवास व्यवस्थापन र पर्यटकीय स्थल भ्रमण गराउने योजना बनाएको संयोजक श्रेष्ठले बताउनुभयो ।
“प्रतिनिधी र पर्यवेक्षकहरुलाई बेनी वरपरका धार्मिक पर्यटकीय स्थल भ्रमण गराउने, सांस्कृतिक प्रर्दशनी र स्थानीय उत्पादनको बिक्री केन्द्र बनाउने तयारी छ,” उहाँले भन्नुभयो “जेसीजको सम्मेलनले म्याग्दीको पर्यटन विकासमा सहयोग पुग्ने अपेक्षा गरेका छौ ।”
