गोपाल आचार्य
धारापानी, । म्याग्दीको धवलागिरी गाउँपालिका–७ धारापानीमा निर्माण भएको किसानी चन्द्रकुन्ता माविको भवन शनिबार उद्घाटन गरिएको छ ।
भूमिगत पहिरोले ढाँडटोलमा रहेको पुरानो भवन क्षति पु¥याएपछि धारापानीकै किम्बोट भन्ने ठाउँमा स्थानीयबासीले उपलब्ध गराएको जग्गामा भवन निर्माण गरेर स्थानान्तरण गरिएको छ ।
भवन बनाउन स्थानीय चक्रबहादुर थापा, उहाँका भाई पुर्ण थापा, बहिनी सुवा र मना खत्रीले बुवा चन्द्रबहादुर थापा र आमा कुन्ता देवी थापाको नाममा ६ रोपनी भन्दा बढी जग्गा उपलब्ध गराउनुभएका थियो ।
सो जग्गामा राष्ट्रिय पुननिर्माण प्राधिकरणको रु. ७० लाख सहयोगमा निर्माण भएको चार कोठे भवन जग्गादाता चक्रबहादुर थापाले उद्घाटन गर्नुभएको हो । यसअघि सो जग्गामा गुड नेवर्स इन्टरनेशनलको सहयोगमा संगम म्याग्दीद्धारा सञ्चालित सामुदायिक बिकास परियोजना र समुदायको कुल रु. ७३ लाख ७१ हजार ४५० को लागतमा चार कोठे भवन निर्माण भएको थियो ।
भवन उद्घाटन कार्यक्रममा धवलागिरी गाउँपालिकाका उपाध्यक्ष रेशम पुनले राष्ट्रपति शैक्षिक सुधार कार्यक्रम मार्फत यस वर्ष थप चार कोठे भवन निर्माणका लागि बजेट बिनियोजन भएको जानकारी दिनुभयो ।
कक्षा १० सम्मको पठनपाठन हुने दुई सय भन्दा बढी विद्यार्थी रहेको विद्यालयले किमबोटको नयाँ भवनमा पठनपाठन सञ्चालन गरेको छ । २०७७ असार अन्तिम हप्ताको भिषण बर्षाका कारण बिद्यालय रहेको ढाडँटोलमा जमिन धाँजा फाटेर चिरा चिरा परेपछि २० कोठे कक्षा कोठा भवन र ६ वटा शौचालयका भवन भत्किएका थियो ।
भवन उद्घाटनको अवसरमा विद्यालय स्तरीय नृत्य प्रतियोगिता पनि भएको थियो । नृत्य प्रतियोगिताको आइतबार नतिजा सार्वजनिकका साथै इन्द्रेणी समुहका कलाकारहरुको उपस्थितिमा सांस्कृतिक कार्यक्रम र चन्दादाताहरुलाई सम्मान गर्ने कार्यक्रम छ ।
विद्यालय व्यवस्थापन समितिका अध्यक्ष चक्रबहादुर थापाको अध्यक्षता, रिमप्रकाश थापाको स्वागत, शिक्षक जिवन पौडेल र विकास केसीको सञ्चालनमा सम्पन्न कार्यक्रममा गाउँपालिकाका उपाध्यक्ष रेशम पुनमगर, सहयोगदाता उमेश राना, भरत थापा लगायतले मन्तब्य व्यक्त गर्नुभएको थियो ।
