बेनी । म्याग्दीको बेनी नगरपालिकालाई सोमबार पूर्णखोप सुनिश्चित घोषणा गरिएको छ ।
चालु आर्थिक वर्ष २०७८÷७९ मा बेनी नगरपालिकामा रहेका १६ देखि २३ महिनासम्मका सवै बालबालिकालाई १५ महिनाको उमेर भित्र पाउनुपर्ने सवै खोप दिलाएकाले पूर्ण खोप सुनिश्चितता घोषणा गरिएको हो ।
नगरपालिकाका स्वास्थ्य शाखाका सिनियर अहेव डिल्लीराज आचार्यले लक्षित उमेर समुहका ३१७ जना बालबालिकाले १५ महिनाभित्र लगाउनुपर्ने १२ प्रकारका रोग विरुद्धको सबै खोप लगाएका जानकारी दिनुभयो । जनप्रतिनिधी र स्वास्थ्यकर्मीहरुले आगामी दिनमा लक्षित समुदायका सवै बालबालिकालाई खोप सुविधा उपलब्ध गराउने प्रतिविद्धता जनाउनुभएको छ ।
नगर प्रमुख सुरत केसी, उपप्रमुख ज्योती लामिछाने पौडेल, प्रमुख प्रशासकीय अधिकृत धोलकराज ढकाल, वडा अध्यक्ष र कार्यपालिका सदस्यहरुको उपस्थितिमा जिल्ला खोप समन्वय समितिका सदस्य सचिव स्वास्थ्य कार्यालय म्याग्दीका निमित्त प्रमुख एकनारायण लम्सालले पूर्णखोप सुनिश्चितता नगरपालिकाको प्रमाणपत्र हस्तान्तरण गर्नुभएको थियो ।
पूर्णखोप सुनिश्चित गर्ने राष्ट्रिय पूर्णखोप निर्देशिका बमोजिम सम्पूर्ण प्रक्रीयाहरु पुरा गरी घोषणा गरिएको स्वास्थ्य शाखा संयोजक लिला गौतमले बताउनुभयो ।
