बेनी । म्याग्दीको मंगला गाउँपालिका वडा नम्बर ३ को अध्यक्षमा नेकपा माओवादी केन्द्रका यामबहादुर रोका विजयी हुनुभएको छ ।
रोकाले ७९१ मत ल्याएर विजयी हुँदा उहाँका प्रतिस्पर्धी एमालेका कविन्द्र रोकाले ५७७, काँग्रेसका टेकबहादुर छन्त्यालले २१५ र राप्रपाका सिंहप्रसाद तुलाचनले १९ मत पाउनुभयो । वडा सदस्यमा माओवादीका नन्दलाल गिरी, भेषकुमारी पुन, टिकादेवी कामी र एमालेका कुलबहादुर थापा निर्वाचित हुनुभएको निर्वाचन अधिकृतको कार्यालयले जनाएको छ । वडा सदस्यमा एमालेका थापाले माओवादीका मिलन रोकालाई ५ मतले पराजित गर्नुभएको हो ।
तीन वटा वडाको मतगणना सकिदाँ मंगलाको अध्यक्षमा एमालेका सतप्रसाद रोकाले दुई हजार ६९८, नेपाली काँग्रेसका बिरेन्द्र बुढाथोकीले एक हजार ७१९, नेकपा माओवादी केन्द्रका टेकबहादुर बिकले ९८३, राप्रपाका योगेन्द्रमान शेरचनले ६८ र मंगोलका गिरु रोकाले १४ मत पाउनुभएको छ ।
उपाध्यक्षमा एमालेकी पेमा अधिकारीले दुई हजार ८१५, काँग्रेसकी सर्मिला थापाले एक हजार ६५९, माओवादीकी सुकमाया रोकाले ९०३ र राप्रपाकी विन्दु मल्लले ८७ मत पाउनुभएको छ ।
