बेनी । रघुगंगा गाउँपालिका–३ पिप्लेमा नक्कली नोट भेटिएको छ । राहुघाट जलविद्युत आयोजनाको तेस्रो अडिटमा काम गर्ने एक मजदुरले स्थानीय ब्यापारीलाई दुई हप्ता अघि दिएको नोट शंका लागेपछि परिक्षण गर्न बेनी पठाएका थिए ।
रु. एक हजार दरका दुई वटा नोटलाई सदरमुकाम बेनीमा ल्याएर एक वित्तिय संस्थामा परिक्षण गर्दा सक्कली नभएको र संकास्पद भएको पुष्टि भएको थियो । दुबै नोट बाख्ला र खस्रो भएपछि स्थानीयले बेनीमा ल्याएर वित्तिय संस्थामा उक्त नोटलाई परिक्षण गराएका थिए ।
आयोजनाको सिभिल ठेकेदार जयप्रकाश एसोसियट्स (जेपी)को तर्फबाट अडिटमा खटिएका सुपरभाइजर तहका प्रतिनिधिबाट मजदुर हुँदै पसलसम्म उक्त नक्कली नोट पुगेको स्थानीयबासी नारायण सुवेदीले बताउनुभयो ।
‘‘मजदुरबाट फेला परेका संकास्पद मानिएका नक्कली नोटले स्थानीयबासी चिन्तीत बनेका छन्,” उहाँले भन्नुभयो “पसलमा लगेका दुई वटै नोट नक्कली हुनुले कतै ठुलै संख्यामा गाउँमा नक्कली नोटको बिगविगी त भएको छैन भन्ने बिषयले गम्भीर बनाएको छ ।’’
नियोजित रुपमा नक्कली नोट फिजाइएको हुनसक्ने भन्दै उहाँले उक्त बिषयमा गम्भिर छानविन गरि दोषिमाथि कारबाही गर्नुपर्ने र उक्त कार्यलाई नियन्त्रण गर्न सम्बन्धीत सरोकारवालाको ध्यान जानुपर्ने बताउनुभयो ।
नेपाल विद्युत् प्राधिकरणको सहायक कम्पनी रघुगंगा हाइड्रो लिमिटेडले निर्माण गर्न लागेको ४० मेगावाट क्षमताको राहुघाट जलविद्युत् आयोजनाको सिभिल ठेकेदार जयप्रकाश एसोसियट्स (जेपी)ले सुरुङ, विद्युतगृहत र पावर हाउस निर्माणका काम गरिरहेको छ ।
म्याग्दीका प्रहरी नायव उपरीक्षक श्यामकुमार राइले नक्कली नोटको विषयमा अनुसन्धान थालिएको, थप तत्थ्य र प्रमाण जुटाउन नोटको परिक्षणसँगै विभिन्न प्रक्रीया थालिएको बताउनुभयो । म्याग्दीमा चुनावको मुखमा नक्कली नोट भेटिने गर्छ ।
