चिमखोला । म्याग्दीको रघुगंगा गाउँपालिका भएर बग्ने राहुघाट नदीमा एकैसाथ दुई वटा जलबिद्युत आयोजना निर्माण शुरु भएको छ ।
तुँदी पावर कम्पनीले ३५.५ मेगावाट क्षमताको मंगले राहुघाट र ४८.५ मेगावाट क्षमताको अपर (माथिल्लो) राहुघाट जलबिद्युत आयोजना निर्माण गर्न लागेको हो । आयोजनाका आवासीय इञ्जिनियर प्रकाश तिमिल्सीनाले दुई वटै आयोजनाको पहुँचमार्ग सकेर सुरुङ खन्ने काम थालिएको बताउनुभयो ।
“मौवाफाँटदेखि बन्दिघाटसम्म सडक र दुई वटा बेलिब्रिज बनाएर आयोजना निर्माण स्थललाई पहुँचमार्गसँग जोडेका छौ,” उहाँले भन्नुभयो “सुरुङ निर्माण थालिसकेको दुई वटै आयोजनाको बिद्युतगृह र बाँधको काम शुरु गर्ने तयारीमा छौ ।”
पाँच हजार पाँच सय मिटर मध्य दुईवटा अडिटबाट ५२० मिटर सुरुङ खनिसकिएको राहुघाट मंगलेको थप तीन वटा अडिटबाट सुरुङ खन्ने तयारी भएको छ । अपर राहुघाटको पाँच किलोमिटर मध्य दुई वटा अडितबाट २३१ मिटर सुरुङ निर्माण सकिएको छ ।
बन्दीमा बाँध निर्माणाधिन रहेको राहुघाट मंगले जलबिद्युत आयोजनाको चिमखोलाको मलाङमा बिद्युतगृह बनाउन जग्गा ब्यवस्थापनको काम भैरहेको छ । दग्नामको अजिंगर भिरदेखि बन्दीसम्म ७ किलोमिटर पहुँचमार्ग खनेको यस आयोजनाले चिमखोला स्थित बगरखोला माथि ३० मिटर लामो बेलिब्रिज निर्माण गरेपछि आवत–जावत सहज भएको छ ।
घ्याँसीखर्कमा अर्को बेलिब्रिज बनाउने तयारी गरेको आयोजनाका प्रतिनिधि उपेन्द्र गौतमले बताउनुभयो । कुल लागत रु. पाँच अरब ९२ करोड लागत अनुमान गरिएको मंगले राहुघाटको आउटलेट देखि ३५० मिटर तल पानी बिद्युतगृहमा खसालेर बिद्युत उत्पादन गरिनेछ् ।
राहुघाट मंगलेकोको बिद्युतगृहबाट निस्कने र बगरखोलाको पानी मिसाएर मलाङमै बाँध र राहुघाट जलबिद्युत आयोजनाको बाँध देखि ५०० मिटर माथि बिद्युतगृह बनाउने गरि अर्को माथिल्लो राहुघाट जलबिद्युत आयोजनाको पनि निर्माण शुरु भएको हो ।
बिद्युतगृह र अडिट निर्माण स्थल पुग्ने पहुँचमार्ग निर्माण भएको छ । बिद्युतगृह निर्माण स्थल नजिकै राहुघाट नदीमाथि ६९ मिटर लामो बेलिब्रिज निर्माण भएको छ । आयोजना निर्माणमा आवश्यक बिस्फोटक पदार्थको भण्डारण र सुरक्षाका लागि रघुगंगा–७ चिमखोलामा नेपाली सेनाको क्याम्प तथा प्रहरीको चौकी स्थापना भएको छ ।
उत्पादीत बिद्युत केन्द्रिय प्रशारण लाइनमा जोड्न रघुगंगा–३ अम्बाङमा बन्न लगेको राहुघाट सबस्टेशन देखि चिमखोलासम्म २०० केभी क्षमताको १३ किलोमिटर दुरीको प्रशारण लाइन बनाउन वातावरणीय परीक्षणको प्रक्रियामा रहेको छ ।
राहुघाट नदीको सहायक ठुलोखोलामा संयुक्त उर्जा प्रा.लीले २१.३ मेगावाट क्षमताको ठुलोखोला जलबिद्युत आयोजना निर्माण थालेको रघुगंगा गाउँपालिकाका अध्यक्ष भबबहादुर भण्डारीले जानकारी दिनुभयो । राहुघाट नदीमै नेपाल बिद्युत प्राधिकरणको सहायक कम्पनी रघुगंगा हाइड्रो लिमिटेडले ४० मेगावाट क्षमताको राहुघाट जलबिद्युत आयोजना निर्माण गरिरहेको छ । राहुघाटको ३५ प्रतिशत पुर्बाधार निर्माण सकिएको छ ।
