![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी, कोरोना (भाइरस)को दोस्रो लहरको महामारी फैलिएपछि बन्द भएका म्याग्दीका शैक्षिक संस्था र तातोपानीका कुण्डहरु असोज १ गते देखि खुल्ने भएका छन् ।
जिल्ला प्रशासन कार्यालयमा सोमबार बसेको कोभिड–१९ संकट ब्यवस्थापन केन्द्रको बैठकले गत बैशाख दोस्रो हप्तादेखि बन्द भएका शैक्षिक संस्था र तातोपानीका कुण्ड खुलाउने निर्णय गरेको हो ।
प्रमुख जिल्ला अधिकारी गणेशबहादुर अधिकारीले कोभिड–१९ सम्बन्धी सुष्म योजना र ‘स्मार्ट लकडाउन’को अवधारणा अनुसार बिद्यालय र तातोपानी कुण्ड खुलाउने निर्णय गरिएको जानकारी दिनुभयो ।
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
![](https://dhaulagirikhabar.com/wp-content/uploads/2021/09/CDO-Gadesh-Bahadur-Adhakari.jpg)
“बेनी नगरपालिका र मालिका गाउँपालिकाबाट बिद्यालय खुलाउन सिफारिस भएर आएको थियो,” उहाँले भन्नुभयो “कोरोना संक्रमणको दर घटेकाले स्वास्थ्य सुरक्षाका मापदण्ड कडाइका साथ पालना गरेर भौतिक उपस्थितिमै पठनपाठन गराउने निर्णय भएको हो ।”
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
धवलागिरी, रघुगंगा, मंगला र अन्नपूर्ण गाउँपालिकाले यसअघिनै बिद्यालय सञ्चालन गरिरहेका थिए । यसैगरी म्याग्दीमा रहेका प्राकृतिक तातोपानीका कुण्डहरुमा जिल्लाबासीका लागि सर्त पालना गरेर स्नानका लागि खुलाउने निर्णय भएको छ ।
कोरोना बिरुद्धको खोप लगाएको १० दिन नाघेका र ७२ घण्टाभित्रको पिसिआर तथा एन्टिजेनको नेगेटिभ रिपोर्ट भएका जिल्लाबासीलाई तातोपानीमा स्नान गर्न दिइने भएको छ । बेनी नगरपालिकाको सिंगा, अन्नपूर्ण गाउँपालिकाको भुरुङ्ग, रातोपानी, सेकार्कु, रघुगंगाको दर्मिजा, धवलागिरीको बगर र गुर्जामा प्राकृतिक तातोपानीका कुण्डहरु रहेका छन् ।
सिंगा तातोपानी कुण्ड ब्यवस्थापन समितिले नगरपालिका र प्रशासनमा कुण्ड खुलाउन माग गरेर निवेदन दिएका थिए । धार्मिक स्थल, मठमन्दिरहरुमा पुजाआजा र पर्यटकीय स्थलमा भ्रमण खुलाउने निर्णय गर्ने जिम्मेवारी स्थानीय तहलाई दिएको छ ।
म्याग्दी कोरोनाका सक्रीय संक्रमितको संख्या ५० जना भन्दा कम छ । ४५ मध्य ३० वटा वडामा कोरोना संक्रमित छैनन् । रेडजोनबाट ग्रिनजोन बनेको छ । हालसम्म जिल्लाभर तीन हजार २४८ जनामा कोरोना संक्रमण पुष्टि भएको स्वास्थ्य कार्यालयको पछिल्लो तथ्याङ्क छ ।
स्वास्थ्य कार्यालयका निमित्त प्रमुख एकनारायण लम्सालका अनुसार म्याग्दीमा हालसम्म ३२ हजार जना भन्दा बढीले कोरोना बिरुद्धको खोप लगाएका छन् । १८ वर्ष भन्दा माथि उमेर समूहका नागरिकको संख्या ६७ हजार जना छ ।
धवलागिरी गाउँपालिकाका सबै लक्षित समुदायले कोरोना बिरुद्धको खोप लगाएका छन् । जिल्लाभित्र ५४ र जिल्ला बाहिर २६ जना गरि कुल ८० जनाको कोरोना संक्रमणका कारण ज्यान गएको छ ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)