धौलागिरि खबर

रेडक्रसकर्मीद्धारा ३२ शवको निशूल्क ब्यवस्थापन

बेनी । म्याग्दीमा पछिल्लो पाँच महिनाको अवधिमा कोरोना (भाइरस)को संक्रमणबाट ज्यान गुमाएका ३२ जनाको शव रेडक्रसकर्मीहरुले निशूल्क ब्यवस्थापन गरेका छन् ।

बेनी र स्थानीय तहहरुले सञ्चालन गरेको कोरोना अस्पतालमा ज्यान गुमाएका संक्रमितको शव ब्यवस्थापन गर्न गत बैशाखमा नेपाल रेडक्रस सोसाइटी म्याग्दीले शाखाका उपमन्त्री सुरत केसीको नेतृत्वमा स्वमसेवकको टोली बनाएको थियो ।

शाखा सभापति लेखबहादुर हमालले कोरोना संक्रमणबाट ज्यान गुमाएका ३२ जनाको शव सरकारको मापदण्ड पुरा गरेर रेडक्रसकर्मीहरुले निशूल्क ब्यवस्थापन गरेको जानकारी दिनुभयो । उपमन्त्री केसीको नेतृत्वमा जिल्ला प्रशासन कार्यालयका कर्मचारी आनन्द रिजाल, बेनी अस्पतालका कर्मचारी जनक सोनाम लगायतको शव ब्यवस्थापन गर्ने स्वमसेवक टोली बनाएको थियो ।

Rara Auto Mobiels

पहिलो र दोस्रो लहरको कोरोना भाइरसबाट म्याग्दीमा तीन हजार २१५ संक्रमित भएका र ८० जनाको मृत्यु भएको स्वास्थ्य कार्यालयले जनाएको छ । रेडक्रसको स्थापना दिवसको अवसरमा शनिबार बेनीमा आयोजित कार्यक्रममा शाखाले कोरोना महामारी नियन्त्रण, बिपद् ब्यवस्थापनको क्षेत्रमा गरेका गतिबिधीहरुको बारेमा जानकारी गराइएको थियो ।

सोही कार्यक्रममा पत्रकारहरुका लागि पत्रकार महासंघ म्याग्दी शाखाका अध्यक्ष प्रकाश पौडेल र सचिब सन्तोष गौतमलाई दुई हजार थान सर्जिकल मास्क र ४० बोत्तल स्यानीटाइजर उपलब्ध गराएको छ ।

रेडक्रसका शाखा सभापति लेखबहादुर हमाल, कोषाध्यक्ष नवराज पौडेल, उपमन्त्री सुरत केसी, सदस्य बिष्णु रोका, रामप्रसाद पौडेल, यामबहादुर बानिया, कार्यालय प्रमुख धनञ्जयकुमार श्रेष्ठले महासंघका शाखा अध्यक्ष प्रकाश पौडेल, सचिब सन्तोष गौतम र सदस्य सन्दिप शर्मालाई सामग्री हस्तान्तरण गर्नुभएको थियो ।

कोरोनाको जोखिमका बिच सञ्चारकर्ममा खटिएका पत्रकार तथा सञ्चारकर्मीहरुलाई सुरक्षित बनाउन सहयोग पुगोस भन्ने उद्देश्यले सामग्री उपलब्ध गराएको शाखा सभापति हमालले बताउनुभयो ।

पत्रकार महासंघ म्याग्दी शाखाका अध्यक्ष पौडेलले महासंघले विभिन्न दाता र प्रदेश समितिबाट प्राप्त भएको स्वास्थ्य सुरक्षाका सामग्री आवश्यक पर्ने पत्रकारहरुलाई कार्यालयबाट उपलब्ध गराइदै आएको बताउनुभयो ।

रेडक्रस म्याग्दी शाखाले बिपद् ब्यवस्थापन, बेनीमा रक्तसञ्चार गृह र दरबाङमा आँखा उपचार केन्द्र, तीन वटा एम्बुलेन्स सञ्चालनका साथै रघुगंगा गाउँपालिकाको बेग, दग्नाम र चिमखोलामा आइरिस रेडक्रसको सहयोगमा एक हजार जनालाई विभिन्न सिपमुलक तालिम प्रदान गरेको जनाएको छ ।

कोरोना नियन्त्रणका लागि बिद्यालय, स्वास्थ्य संस्था, वडा कार्यालय, उपशाखाहरुलाई स्वास्थ्य सामग्री बितरण गरेको रेडक्रस म्याग्दीको गोदाममा चालीस हजार भन्दा बढी मास्क छन् । गत बर्खामा १४८ परिवारलाई नगद र राहत सामग्री तथा यसपाली ८० परिवारलाई राहत सामग्री उपलब्ध गराएको छ ।

रेडक्रसले बेनी अस्पताल परिसरमा सञ्चालन गरेको रक्तसञ्चार गृहबाट सुबिधा लिनेहरुलाई स्थानीय तहहरुसँगको समन्वयमा निशूल्क रगत परिक्षण गर्ने ब्यवस्था मिलाउन लागेको छ । जसका लागि रघुगंगा गाउँपालिकाले रु. एक लाख र जिससले रु. एक लाख उपलब्ध गराएका छन् । रेडक्रसले दरबाङमा सञ्चालन गरेको आँखा उपचार केन्द्र भने ब्ययभार थेग्न नसकेपछि बन्द गर्नुपर्ने अवस्था आएको सभापति हमालले बताउनुभयो ।

Dhakal lab
प्रतिक्रिया दिनुहोस
Loading...