बेनी । नेपाल रेडक्रस सोसाइटी जिल्ला शाखा म्याग्दीले पत्रकारहरुका लागि स्वास्थ्य सुरक्षा सामग्री उपलब्ध गराएको छ । रेडक्रस स्थापना दिबसको अवसर पारेर पत्रकार महासंघ म्याग्दी शाखा मार्फत दुई हजार थान सर्जिकल मास्क र ४० बोत्तल स्यानीटाइजर उपलब्ध गराएको हो ।
रेडक्रसका शाखा सभापति लेखबहादुर हमाल, कोषाध्यक्ष नवराज पौडेल, उपमन्त्री सुरत केसी, सदस्य बिष्णु रोका, रामप्रसाद पौडेल, यामबहादुर बानिया, कार्यालय प्रमुख धनञ्जयकुमार श्रेष्ठले महासंघका शाखा अध्यक्ष प्रकाश पौडेल, सचिब सन्तोष गौतम र सदस्य सन्दिप शर्मालाई सामग्री हस्तान्तरण गर्नुभएको थियो ।
कोरोनाको जोखिमका बिच सञ्चारकर्ममा खटिएका पत्रकार तथा सञ्चारकर्मीहरुलाई सुरक्षित बनाउन सहयोग पुगोस भन्ने उद्देश्यले सामग्री उपलब्ध गराएको उहाँले शाखा सभापति लेखबहादुर हमालले बताउनुभयो ।
पत्रकार महासंघ म्याग्दी शाखाका अध्यक्ष पौडेलले महासंघले विभिन्न दाता र प्रदेश समितिबाट प्राप्त भएको स्वास्थ्य सुरक्षाका सामग्री आवश्यक पर्ने पत्रकारहरुलाई कार्यालयबाट उपलब्ध गराइदै आएको बताउनुभयो ।
रेडक्रस म्याग्दी शाखाले बिपद् ब्यवस्थापन, बेनीमा रक्तसञ्चार गृह र दरबाङमा आँखा उपचार केन्द्र, तीन वटा एम्बुलेन्स सञ्चालनका साथै रघुगंगा गाउँपालिकाको बेग, दग्नाम र चिमखोलामा आइरिस रेडक्रसको सहयोगमा एक हजार जनालाई विभिन्न सिपमुलक तालिम प्रदान गरिएको जनाएको छ ।
कोरोना नियन्त्रणका लागि बिद्यालय, स्वास्थ्य संस्था, वडा कार्यालय, उपशाखाहरुलाई स्वास्थ्य सामग्री बितरण गरेको रेडक्रस म्याग्दीले बैशाख यता कोरोनाका कारण ज्यान गुमाएका ३२ जनाको शब स्वमसेवक खटाएर निशूल्क ब्यवस्थापन गरेको छ ।
म्याग्दीलाई रगत परिक्षण शूल्क निशूल्क जिल्ला बनाउन रघुगंगा गाउँपालिकाले रु. एक लाख र जिससले रु. एक लाख उपलब्ध गराएका छन् । रघुगंगाका नागरिकको निशूल्क रगत परिक्षण गर्ने सुबिधा उपलब्ध गराएको छ । रेडक्रसले दरबाङमा सञ्चालन गरेको आँखा उपचार केन्द्र भने ब्ययभार थेग्न नसकेपछि बन्द गर्नुपर्ने अवस्था आएको सभापति हमालले बताउनुभयो ।
