बेनी । नेपाली काँग्रेसको आसन्न १४ औँ महाधिबेशन अन्तरगत म्याग्दीमा शुक्रबार हुने वडा अधिवेशनको तयारी पुरा भएको छ ।
वडा अधिवेशनबाट कार्यसमितिको नेतृत्व, पालिका, प्रदेश निर्बाचन क्षेत्र र जिल्ला अधिवेशनका प्रतिनिधि छनौटका लागि बिहिबार ४५ जना मतदान अधिकृत सम्बन्धित वडामा पुगेर तयारी गरेका हुन् ।
भवितव्य नभए सबै वडामा अधिवेशन सम्पन्न हुने जिल्ला सभापति खमबहादुर गर्बुजा (खम्बीर) ले जानकारी दिनुभयो । ‘सबै वडामा तयारी पुरा गरेका छौँ,’ उहाँले भन्नुभयो, ‘सबै वडामा सहमतीमा कार्यसमिति चयन हुने विश्वास लागेको छ ।’
काँग्रेसले वडा अधिवेशनको निर्वाचनका लागि नेपाल शिक्षक संघमा आबद्ध शिक्षकहरुलाई परिचालन गरेको छ । आगामी असोज पहिलो साताभित्र काँग्रेसले सबै तहमा नयाँ नेतृत्व पाउने भएकाले नेता कार्यकर्ता सक्रिय भएका छन् ।
पालिका, क्षेत्र र जिल्लाको नेतृत्व संगै महाधिवेशन प्रतिनिधि छनौटमा वडाबाट चुनिएर आउने प्रतिनिधिहरु नै निर्णायक हुने भएकाले काँग्रेसमा वडा अधिवेशनलाई निकै चासोका साथ लिईएको छ ।
यसका लागि सबै नेताहरु आफ्नो वडामा पुगेका छन् । जिल्ला बाहिर रहेका पार्टीका नेताहरु समेत वडा अधिवेशनको लागि गाउँ फर्किएपछि चलहपहल बढेको छ ।
१० वटा वडा रहेको बेनी नगरपालिकाको घतानमा केही सकस भएतापनी अन्य सबै वडामा सहमतीमा नेतृत्व टुङ्ग्गो लाग्ने नगर सभापती अनोद श्रेष्ठले जानकारी दिनुभयो ।
७ वटा वडा रहेको मालिका गाउँपालिका अध्यक्ष रहेका नेपाली काँग्रेस म्याग्दीका नेता श्रीप्रसाद रोकाका अनुसार मालिका गाउँपालिका सबै वडामा सहमतीमा नेतृत्व चयन गरिने भएको छ । उहाँका अनुसार सबै वडामा छलफल भएको छ । कतीपय वडामा नेतृत्व चयनका लागि सहमती भएको र घोषणा गर्न मात्र बाँकी रहेको छ ।
‘हामीले सबै वडामा सहमतीमा नै नेतृत्व चयन गर्नेछौँ, यस पटक सबैलाई पद पुग्छ किन? चुनाव गर्ने ?’ उहाँले भन्नुभयो, ‘केही वडामा नेतृत्व टुङ्याईसकेका छौँ, केही वडामा छलफल भएको छ भोली सम्ममा टुङ्गो लाग्छ ।’
त्यस्तै ७ वटा वडा रहेको धवलागिरी गाउँपालिकाले पनी सबै वडामा नयाँ नेतृत्व चयन सहमतीमा नै गर्नें भएको छ । गाउँपालिका सभापती प्रेम पुनले सबै वडामा प्रतिनिधी र वडाको नेतृत्वको लागि सहमति गरिने बताउनुभयो । ‘करिब सबै वडामा सहमती भैसकेको छ, अब केही पदका सहमती हुन बाँकी छ त्यो अधिवेशन सुरु हुन अघि नै समाधान हुन्छ,’ पुनको भनाई छ ।
८ वटा वडा रहेको अन्नपूर्ण गाउँपालिका वडा न ६ घारमा वडा सभापतीको आंकाक्षी ३ जना देखिएकाले समहमतीमा सकस हुने देखिएको छ । नेपाली काँग्रेस अन्नपूर्ण गाउँपालिकाका सचिव सुजन बरुवालले सहमतीमा नेतृत्व चयन गर्न छलफल भइरहेको बताउनुभयो ।
८ वटा वडा रहेको रघुगंगा गाउँपालिकामा पनी सहमतीमा नेतृत्व चयन गरिने गाउँपालिका सभापती जिबनकुमार मल्ले जानकारी दिनुभयो । उहाँले नेतृत्वका लागि सबै वडामा छलफल भएको र सहमतीमा चयन हुने बताउनुभयो ।
५ वटा वडा रहेको मंगला गाउँपालिकामा पनी सबै वडामा सहमतिमा नेतृत्व चयन हुने प्रदेश निर्वाचन क्षेत्र (ख) का सचिव श्रीराम पौडेलले जानकारी दिनुभयो । उहाँले सबै वडाको नेतृत्वका लागि तयारी सकिएको र शुक्रबार घोषणा हुने बताउनुभयो ।
छ बर्षपछि काँग्रेसको अधिवेशन हुन लागेको हो । काँग्रेसको वडा अधिवेशनमा कुल २ हजार ८ सय ३९ जनाले भाग लिन पाउने छन् । प्रदेश निर्वाचन क्षेत्र क मा ८१० जना नविकरण र एक हजार १४ नयाँ गरि एक हजार ८ सय २४ क्रियाशिल सदस्य रहेको प्रवक्ता अजय मिलन श्रेष्ठले जानकारी दिनुभयो ।
अन्नपूर्णमा १४३ नविकरण, २१५ नयाँ गरि ३५८ जना, रघगंगामा १५६ नविकरण, २६५ नयाँ गरि ४२१ जना र बेनी नगरपालिकामा ५११ नविकरण, ५४३ नयाँ गरि एक हजार ५४ जना क्रियाशिल सदस्य रहेका छन् ।
प्रदेश निर्वाचन क्षेत्र (ख) मा २७४ नविकरण, ७४१ नयाँ गरि एक हजार १५ जना क्रियाशिल सदस्य छन् । धवलागिरीमा ७१ नविकरण, २०८ नयाँ गरि २८९ जना, मालिकामा ७५ नविकरण, २०२ नयाँ गरि २७७ जना र मंगलामा १२८ नविकरण ३३१ नयाँ गरि ४५९ जना क्रियाशिल सदस्य रहेको छन् । म्याग्दी काँग्रेसमा पुराना नविकरण भएका १ हजार ८४ जना र नयाँ थप भएका १ हजार ७५५ जना क्रियाशिल सदस्यहरुले मात्रै वडामा उम्मेदवार र नेतृत्व चयनमा मताधिकार पाउनेछन् ।
काँग्रेसमा नयाँ संरचनामा पहिलो पटक हुन लागेको महाधिवेशनमा वडा, प्रदेश निर्वाचन क्षेत्र र जिल्ला समितिमा समेत अधिकांश पद प्रत्यक्ष निर्वाचनबाट चुनिने व्यवस्था गरिएको छ । तीनै तहमा सभापति एक जना, उप–सभापति, सचिब र सह–सचिब दुई÷दुई जना प्रत्येक्ष निर्वाचित हुने र निर्वाचित सदस्य मध्येबाट कोषाध्यक्ष मनोनित गर्ने गरि पदाधिकारीको छनौट गर्ने नयाँ प्रावधान राखिएको छ ।
वडा अधिवेशनले वडाका ८ जना पदाधिकारी र सदस्य समेत गरि २३ जनाको कार्यसमिति चयन गर्नेछ । यसमा वडा सभापतिले २० प्रतिशत सम्म सदस्य मनोनित गर्न पाउने व्यवस्था छ । त्यसैगरि वडाबाट पालिका, प्रदेश निर्वाचन र जिल्ला अधिवेशन प्रतिनिधिको रुपमा १५ जना र सभापती समेत गरि १६ जनालाई प्रतिनिधिको रुपमा छनौट हुनेछन् ।
