बेनी । पहिरोबाट बिस्थापित पर्वतको जलजला गाउँपालिका–७ धाइरीङको किराखोर बस्ती स्थानान्तरण गर्ने ठाउँ खोजी गरिएको छ ।
पहिरोले घर र जग्गा जमिन छिया छिया बनाएपछि बिद्यालय, अस्थाई टहरा र आफन्तकोमा बसेकाहरुको स्थायी बसोबासको ब्यवस्था मिलाउन वडा कार्यालयले सम्भावित ठाउँको खोजी सुरु गरेको हो ।
वडा अध्यक्ष टुङ्गनाथ शर्माले पहिरो पिडितलाई एकिकृत बस्ती बनाएर बसोबासको ब्यवस्था मिलाउन अध्ययन थालिएको जानकारी दिनुभयो । सोमबार वडा सदस्य पुर्णबहादुर दर्जीको नेतृत्वमा एकिकृत बस्ती बनाउन प्रस्ताव गरिएको भुरुङजा र डडुवाको चौरको स्थलगत निरिक्षण भएको छ ।
पहिरो पिडित, सुकुम्बासी र अब्यवस्थित बसोबास गरेकाहरुलाई एकिकृत बस्ती बनाउन जनप्रतिनिधी, राजनीतिकर्मी, अगुवा र पहिरो पिडितका प्रतिनिधीको टोलीले प्रारम्भिक चरणको अध्ययन गरेको हो । स्थलगत निरिक्षणपछि पहिरोबाट बिस्थापित र गाउँपालिकाका पदाधीकारीहरुसँग मंगलबार एकिकृत बस्ती निर्माणको प्रक्रिया अघि बढाउन छलफल गरिएको वडा अध्यक्ष शर्माले बताउनुभयो ।
वडा अध्यक्ष शर्मा, सदस्य दर्जी, नेकपा माओवादी केन्द्रका गाउँपालिका कमिटिका अध्यक्ष दिपक आचार्य, माओवादीका जिल्ला सचिवालय सदस्य दुर्गाबहादुर दर्जी, वडा कमिटि अध्यक्ष हरि आचार्य लगायतको टोलीले निरिक्षण गरेको थियो ।
मिलनचोक देखि धाइरीङ–धारापानी हुदै करिब चार घण्टा पैदल हिडेपछि पुगिने भुरुङ्जा र डडुवामा खुल्ला चौर भएकाले सुरक्षित तथा जग्गा ब्यवस्थापन गर्न सहज हुने देखिएको छ । सडक पुगेको, केन्द्रिय प्रशारणको बिद्युतको लाइन नजिकै रहेको, खानेपानीको स्रोत भएकोले त्यहाँ बसोबासका लागि पहिरोबाट बिस्थापित भएकाहरु इच्छुक देखिएका छन् ।
वडा, पालिका, जिल्ला हुदै प्रदेश र संघीय सरकारसँग जग्गा ब्यवस्थापन र एकिकृत बस्ती बनाउन पहल गरिएको वडा अध्यक्ष शर्माले बताउनुभयो । किराखोरका ३१ सहित जलजलाको ७ नम्बर वडाभर पहिरोबाट बिस्थापित, सुकुम्बासी र अब्यवस्थित बसोबास गरेका करिब एक सय परिवारका लागि एकिकृत बस्ती निर्माणको योजना अघि सारिएको छ ।
बस्तीको चारै तिर पहिरो गएको, जमिन चिरा चिरा परेको र घरहरु जिर्ण बनेर भत्किन थालेपछि किराखोर गाउँनै बिस्थापित बनेको छ ।
