बेनी, । म्याग्दी सदरमुकाम बेनी बजारमा जडान गरिएका अधिकांश सिसिटिभी क्यामेरा बिग्रिएका छन् ।
नियमित मर्मत अभावमा सिसिटिभी क्यामेराले काम गर्न छोडेको हो । बजारका २० भन्दा बढी ठाउँमा राखिएको सिटिटिभी क्यामेराको कन्ट्रोल रुम जिल्ला प्रहरी कार्यालयमा छ । हाल ४ वटा मात्र सिसिटिभीले काम गरेको छ ।
बिद्युतका पोलमा राखिएका सिसिटिभी क्यामेरा तार चुडिने, जल्ने, टुट्ने भएर बिग्रिएका हुन् । प्रहरी नायव उपरिक्षक श्यामकुमार राइले आर्थिक स्रोत र दक्ष जनशक्ति अभावमा सिसिटिभी मर्मत गर्न नसकिएको बताउनुभयो ।
“हामीसँग बजेट छैन, पालिकाहरुलाई प्रस्ताव गरेका छौ,” उहाँले भन्नुभयो “स्थानीय स्तरमा दक्ष व्यक्ति उत्पादन गरेर नियमित रुपमा रेखदेख र मर्मत गर्ने जिम्मेवारी उसैलाई दिने हो भने सजिलो हुन्थ्यो ।”
बेनी नगरपालिकाले गत आर्थिक वर्षमा बजारको सिसिटिभी क्यामेरा ब्यवस्थापन गर्न रु. एक लाख पचास हजार बिनियोजन गरेपनि समन्वय अभाव र बिवादले कार्यान्वयन भएन् । वडा, नगरपालिका र प्रहरी कार्यालय मध्य कसले मर्मत गर्ने भन्ने बिवाद देखिएको थियो ।
पाँच वर्षअघि म्याग्दी उद्योग बाणिज्य संघको अगुवाइमा बेनीमा सिसिटिभी जडान भएको थियो । सिसिटिभी क्यामेराको सहायताले बजारको विभिन्न चोक र संबेदनशिल क्षेत्रमा भएका गतिबिधीलाई निगरानी गर्न प्रहरीलाई सहज भएको थियो ।
लुटपाट, चोरी र दुर्घटना नियन्त्रणमा सहयोग पुगेको थियो । सम्भावित आपराधिक गतिबिधी नियन्त्रण र अनुसन्धानमा सिसिटिभी फुटेजको दृष्यले सहयोग गरेको थियो । बेनी नगरपालिकाका प्रवत्ता रामकृष्ण बराइलीले भने नगरपालिकाले सिसिटभीको नियमित मर्मत गरिरहेको प्रतिक्रिया दिनुभयो ।
