बेनी । विभिन्न संघ, संगठनहरुले रहस्यमय रुपमा बेपत्ता बनाइनुभएका म्याग्दीको बेनी नगरपालिका–५ बगुवाखोलाका शिक्षक भक्त कार्कीको खोजी, निष्पक्ष छानबिन र दोषीलाई कारबाहीको माग गरेका छन् ।
बगुवाखोला स्थित बालगागृति आधारभूत बिद्यालयका प्रधानाध्यापक कार्की आइतबार साँझदेखि बेपत्ता हुनुहुन्छ । बिद्यालय नजिकै म्याग्दी नदीको किनारमा रगतका दाम, कार्कीले लगाउने हाफ ज्याकेट, चप्पल र मोवाइल फेला परेको जिल्ला प्रहरी कार्यालयले जनाएको छ ।
म्याग्दी स्थित नेपाल शिक्षक महासंघ, नेपाल शिक्षक संघ, नेपाल राष्ट्रिय शिक्षक संगठन र एकिकृत अखिल नेपाल शिक्षक संगठनले मंगलबार प्रमुख जिल्ला अधिकारी गणेशबहादुर अधिकारीलाई बेपत्ता कार्कीको खोजी, घटनाको निष्पक्ष छानबिन र दोषीलाई कानुनी दायरामा ल्याउन माग गर्दै ज्ञापनपत्र बुझाएका थिए ।
शिक्षक महासंघ म्याग्दीका अध्यक्ष जयराम सुबेदीको नेतृत्वमा शिक्षक संघ संगठनका प्रतिनिधीहरुले प्रशासनमा पुगेर ध्यानाकर्षण गराउनुभएको थियो । वौद्धिक अपाङ्गता स्रोत कक्षा सञ्चालन भएको बालजागृति आधारभूतका प्रअ कार्की साहित्यसँगै विभिन्नि सामाजिक संघ संस्थामा आवद्ध हुनुहुन्छ ।
यसैगरी म्याग्दी साहित्य समाजका अध्यक्ष ध्रुबलाल शर्मा, सुर्यनारायण पुरस्कार संस्थाका सचिब अजयमिलन श्रेष्ठ, पुलत्स्य साहित्य समाजका अध्यक्ष कृष्णबहादुर बानियाले मंगलबार संयुक्त बिज्ञप्ति जारी गर्दै बेपत्ता कार्कीको खोजी, घटनाको छानबिन र दोषीको कारबाहीको माग गर्नुभएको छ ।
पौलस्त्य साहित्य समाज, म्याग्दीका संस्थापक अध्यक्ष÷संरक्षक, म्याग्दी साहित्य समाजका सल्लाहकार कार्की जनसाहित्य मञ्च नेपालका केन्द्रिय सदस्य हुनुहुन्छ । मञ्चका अध्यक्ष राम बिनयले पनि मंगलबार एक बिज्ञप्ति जारी गरेर बेपत्ताको खोजी, घटनाको छानबिन र दोषीको कारबाहीको माग गर्नुभएको छ ।
कार्कीलाई बेपत्ता बनाएको अभियोगमा प्रहरीले बेनी नगरपालिका–५ चुत्रेनीका एक युवालाई कुश्माबाट पक्राउ गरेको छ । बिद्यालयमा कार्यरत अन्य दुई जना कर्मचारीसँग पनि प्रहरीले निरन्तर सोधपुछ गरिरहेको छ । पक्राउ परेका कसैको पनि नाम प्रहरीले सार्वजनिक गरेको छैन् ।
आइतबार बगुवाखोलामै देखिएका प्रहरीले पक्राउ परेका व्यक्ति घटनापछि हिडेरै कुश्मा पुगेका बताइएको छ । प्रहरी नायव उपरिक्षक श्यामकुमार राइले अनुसन्धानकै क्रममा रहेकाले हत्या अथवा वेपत्ता भन्ने खुली नसकेको बताउनुभयो ।
“घटनास्थलको प्रकृति हेर्दा कर्तब्य ज्यान गरेको जस्तो देखिन्छ,” उहाँले भन्नुभयो “बेपत्ताको खोजीसँगै शंकास्पद व्यक्तिहरुसँग सोधपुछ र अनुसन्धानलाई निरन्तरता दिएका छौ ।” बेपत्ता कार्कीको खोजीमा शसस्त्र प्रहरी र नेपाल प्रहरीको टोली परिचालन भएको छ । नदी किनार र सम्भावित ठाउँमा निगरानी बढाइएको छ ।
कपडा भेटिएको ठाउँ नजिकै स्काभेरटले खोलाको बहाव फर्काएर पनि खोजी गरिएको थियो । आइतबार बिहान ८ बजे घरबाट बिद्यालय जान भनेर निस्कनुभएका कार्की साँझ घर नआएपछि परिवारले खोजी थालेका थिए ।
