![](https://dhaulagirikhabar.com/wp-content/uploads/2021/05/Beni-Hospital-Operation-Room.jpg)
![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी । म्याग्दीको सदरमुकाम स्थित बेनी अस्पतालमा पहिलो पटक आन्द्रा काटेर जोड्ने शल्यक्रिया सफल भएको छ ।
कोरोना .(भाइरस)को महामारीको जोखिम र सिमित स्रोत साधन तथा भौतिक पूर्बाधारका बावजुद बेनी अस्पतालका चिकित्सक नवराज बस्ताकोटी, इश्वर पौडेल सहित स्वास्थ्यकर्मीहरुको टोलीले शल्यक्रिया गरेका हुन् ।
पर्वतको जलजला गाउँपालिका–३ का ४२ वर्षीय पुरुषको सानो आन्द्राको केही भाग काटेर आन्द्रा जोड्ने शल्यक्रिया सफल भएपछि डिस्चार्ज गरिएको चिकित्सक बस्ताकोटीले शुक्रबार जानकारी दिनुभयो ।
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
“पेट दुख्ने र फुल्ने समस्या लिएर अस्पतालमा आएका बिरामीको हर्नियाको भित्र सानो आन्द्रा अड्किएर उक्त आन्द्रा मरेको अवस्थामा थियो,” उहाँले भन्नुभयो “शल्यक्रियाको क्रममा आन्द्राको खराब भएको भाग काटेर फाली पुनः जोडिएको थियो ।”
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
कोरोनाको जोखिमका कारण घरमै बसेका बिरामी दुखाइको पिडा सहन नसकेपछि अन्तिम अवस्थामा अस्पताल आउनुभएको थियो । उहाँ निको भएर घर फर्कनुभएको छ । पाठेघर बाहिर बच्चा बसेको, बच्चा अघि साल निस्किएको सहित केही दुर्लभ शल्यक्रिया भएको बेनी अस्पतालमा हर्नियाको भित्र अड्कीएको आन्द्रा काटेर फाल्ने र जोड्ने शल्यक्रिया भने पहिलो पटक भएको हो ।
कोरोना महामारीबाट संक्रमित भएकाहरुको आइसोलेशनमा उपचारको साथसाथै अस्पतालले बहिरंग बाहेकका अन्य सेवा निरन्तर दिइरहेको छ । शल्यक्रिया मार्फत गरिने प्रसुति, सामान्य प्रसुति, मृगौलाको डायलाईसीस र भर्ना गर्नुपर्ने बिरामीलाई नियमित सेवा दिइरहेको हो ।
हाइड्रोशिल, हर्नीया र इपेन्डिसाइट्सको अप्रेशन गर्दै आएको बेनी अस्पतालले गत साउनदेखि मृगौलापिडितको डायलाइसीस सेवा सुरु गरेको थियो । ५ शैयाको सघन उपचार कक्ष भने दरबन्दि अनुसारका चिकित्सक र स्वास्थ्यकर्मी नहुँदा सञ्चालन भएको छैन् । कोरोना संक्रमितको उपचारका लागि हाइ डिफिसेन्सी युनिट (एचडियु) र अक्सिजन सहितको २० शैया क्षमताको छुट्टै आइसोलेशन सञ्चालन गरेको छ ।
बेनी अस्पतालले आँखा र दन्त उपचार सम्बन्धी पनि सेवा दिने गरेको छ । छ वर्षअघि १५ बाट पचास शैया क्षमतामा स्तरोन्नति भएपछि बेनी अस्पतालमा पूर्वाधार, जनशक्ति, औजार र उपकरण थपिदै गएको छ ।
निर्माणाधिन पचास शैया क्षमताको भवनलाई पुर्णता दिन र दरबन्दि अनुसार विशेषज्ञ चिकित्सक सहितका जनशक्ति उपलब्ध भएमा बेनी अस्पतालको सेवालाई अझै प्रभावकारी बनाउन सकिने अस्पताल ब्यवस्थापन समितिका अध्यक्ष बेलबहादुर कटुवालले बताउनुभयो ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)