![Add Samajik bikash office](https://dhaulagirikhabar.com/wp-content/uploads/2024/06/Add-Samajik-bikash-office-3.jpg)
बेनी । दोस्रो लहरको कोरोना (भाइरस)को संक्रमण दर तिब्र रुपमा फैलिन थालेपछि बेनीमा आइसोलेशन वार्ड निर्माण शुरु भएको छ ।
कोरोना संक्रमितको उपचारका लागि सदरमुकाममा स्थान अभाव भएपछि बेनी नगरपालिकाको अगुवाइमा आइसोलेशन निर्माण सुरु भएको हो । गत वर्ष नगरपालिका र जिल्लाका अन्य स्थानीय तहहरुले खुल्ला मञ्च स्थित शैक्षिक तालिम केन्द्रको भवनमा स्थापना गरेको २० शैया क्षमताको आइसोलेशन गत फागुनमा हटाइएको थियो ।
पहिलेको ठाउँको आइसोलेशन हटाएपछि पछिल्लो पटक पहिचान भएका कोरोनाका संक्रमितहरु घरमै छन् । घरमा छुट्टै कोठा नभएका र आइसीयुमा राख्नु नपर्ने संक्रमितको उपचारमा समस्या भएपछि बेनी अस्पताल परिसरमा निर्माणाधिन भवनलाई ब्यवस्थित गरेर आइसोलेशन बनाउन लागिएको हो ।
![Shreekrishna hardwear in news](https://dhaulagirikhabar.com/wp-content/uploads/2023/10/Shree-Krishna-Hardware.gif)
प्रमुख जिल्ला अधिकारी गणेशबहादुर अधिकारीले अस्पतालको निर्माणाधिन भवनको पहिलो तलामा सरसफाई, रंगरोगन, बिद्युत, पानी जडान गरेर आइसोलेशन बनाउन लागिएको बताउनुभयो ।
“चिकित्सकको निगरानी भइरहने, सुरक्षा र ब्यवस्थापनका हिसाबले सहज हुने भएकाले निर्माणाधिन अस्पालको भवनमा आइसोलेशन बनाउन लागिएको हो,” उहाँले भन्नुभयो “सम्बन्धित निर्माण कम्पनीका प्रतिनिधीलाईनै आइसोलेशन तयार पार्ने काम गरिरहेका छन् ।”
![Bhautik ministry notice about road](https://dhaulagirikhabar.com/wp-content/uploads/2023/10/Bhautik-ministry-notice-scaled.jpg)
फोहोर हटाएर रंगरोगन गरेपछि कोठा बिभाजन र घेराबार गरिने भएको छ । भवन भित्रको ब्यवस्थापनको काम सम्बन्धित निर्माण ब्यवसायीले गर्ने भएका छन् । भवन निर्माणमा असर नपर्ने गरी आइसोलेशन सञ्चालन गर्ने सर्तमा ब्यवसायीसँग सम्झौता भएको छ ।
बेनी नगरपालिकाका प्रमुख प्रशासकीय अधिकृत छबीलाल सुबेदीले आइसोलेशनमा बस्ने संक्रमितले प्रयोग गर्ने शौचालय नगरपालिकाले बनाउने बताउनुभयो । खानेपानी, जलस्रोत तथा सिचाई डिभिजन कार्यालयसँग समन्वय गरेर छुट्टै शौचालय र खानेपानी ब्यवस्थापन गर्न लागिएको उहाँले बताउनुभयो ।
शैक्षिक तालिम केन्द्रमा गत वर्ष रु. ३७ लाख ५० हजारको लागतमा आइसोलेशन बनाइएको थियो । आधा खर्च बेनी नगरपालिकाले ब्यहोरेको थियो । बाँकी खर्च अन्य पाँच स्थानीय तहलाई भाग लगाएर तिर्न लगाइएको थियो । सो आइसोलेशन वार्डमा संक्रमितको उपचारका लागि आवश्यक उपकरण समेत जडान भएको थियो । आइसोलेशन हटाएपछि ती सामग्री अहिले एउटा कोठामा थन्काएर राखिएका छन् ।
त्यही सामग्री र उपकरण प्रयोग गरेर नयाँ ठाउँमा आइसोलेशन बनाउन लागिएको हो । शैक्षिक तालिम केन्द्रको आइसोलेशन हटाइएको बिषयमा कोभिड–१९ जिल्ला संकट ब्यवस्थापन केन्द्रको बैठकमा स्थानीय तहका प्रतिनिधीहरुले असन्तुष्टि जनाएका थिए । छलफल र कुनै निर्णय बिनै आइसोलेशन हटाउँदा अहिले संक्रमितहरुको उपचारमा समस्या भएको हो ।
म्याग्दीमा हाल ४६ जना सक्रिय संक्रमित छन् । अधिकांश बजार क्षेत्रका छन् । आफ्नै घर हुनेले छुट्टै कोठालाई आइसोलेशन बनाएर बसेका छन् । डेरामा बस्दै आएका संक्रमितहरुलाई आइसोलेशन नहुँदा समस्या भएको छ । परिवारका सदस्यहरुसँग संगै बस्दा संक्रमण फैलिने खतरा हुन्छ ।
अस्पतालका अन्य बिरामीहरुसँगै राखेर उपचार गर्न मिल्दैन् । जटिल अवस्थाका बिरामीलाई उपचारका लागि भने बेनी अस्पतालमा पाँच शैया क्षमताको भेन्टिलेटर सहितको सघन उपचार कक्ष स्थापना भएको छ । अस्पतालको सबै शैयामा पाइपबाट अक्सिजन आपुर्ति गर्ने ब्यवस्था मिलाइएको छ । आइसोलेशन वार्डमा पनि अक्सिजन पाइप बिस्तार गरिने अस्पतालले जनाएको छ ।
![Gandaki dadelo notice](https://dhaulagirikhabar.com/wp-content/uploads/2023/05/Add-aantarik-mamila-upabhokta.jpg)