बेनी । म्याग्दीको अन्नपूर्ण गाउँपालिकाले कृषकहरुलाई आइतबार यान्त्रिक हलो बितरण गरेको छ । गाउँपालिकाको कृषि शाखाले सहकारी, समूह, फर्म सञ्चालकलाई यान्त्रिक हलो (मिनिटेलर÷हाते ट्याक्टर) वितरण गरेको हो ।
पोखरेबगरमा आयोजित कार्यक्रममा गाउँपालिकाका अध्यक्ष क्याप्टेन डमबहादुर गर्बुजा पुन, निमित्त प्रमुख प्रशासकीय अधिकृत हरिकृष्ण आचार्य, कृषि शाखा प्रमुख प्रबिण अधिकारीले यान्त्रिक हलो वितरण गर्नुभएको थियो ।
सार्वजनिक सुचना आव्हान गरेर आवेदन संकलन गरिएको थियो । वडा न. ६ को होलिडे कृषि तथा पशुपंक्षी फर्म, धौलागिरी पशुपालन फर्म, बिरौटा सुन्तला तथा कृषि समूह, नयाँघरे एकिकृत कृषि तथा पशुपंक्षी फर्म, सी कृषि तथा पशुपंक्षी फर्मले यान्त्रिक हलो पाएका छन् ।
यसैगरी शिखको कृषि तथा पशुपालन फर्म, मणीबराह बहुउद्देश्यीय कृषि फर्म, राम्चेको सिर्जनसिल कृषि सहकारी संस्था, भुरुङ्ग–तातोपानीको ठुलोबगर कृषि सहकारी संस्था, नारच्याङको जनजागरण कृषक समूह, हिस्तानको प्रगतिशिल कृषक समूह र पे्रम कृषि तथा पशुपंक्षी फर्म रहेका छन् ।
डिजेल इञ्जिन भएको ७.५ हर्सपावर क्षमताको प्रति यान्त्रिक हलो पचास प्रतिशत अनुदानमा वितरण गरिएको हो । सहकारी, समूह र फर्म सञ्चालकले २७ हजार ५०० रुपैयाँ अनुदान पाएका हुन् ।
कृषि उत्पादन वृद्धी गर्न र लागत घटाउन यान्त्रिकरणका लागि यान्त्रिक हलो बितरण गरिएको कृषि शाखा प्रमुख अधिकारीले बताउनुभयो । कृषकहरुलाई ट्याक्टर चलाउन र मर्मत गर्ने सिप समेत सिकाइएको छ । खेतबारी खनजोतको काममा पछिल्लो समय गोरुको बिकल्पमा यान्त्रिक हलोको प्रयोग बढेको छ ।
सस्तो र छिटो भएपछि कृषकहरुले यान्त्रिक हलोको प्रयोग गर्न थालेका हुन् । स्थानीय तहका कृषि शाखा, कृषि ज्ञान केन्द्र आदीले अनुदान दिने भएकाले यसतर्फ कृषकको आकर्षण बढेको छ ।
