बेनी, । पछिल्लो मनसुनजन्य विपद्बाट प्रभावित बनेको पर्वतको जलजला गाउँपालिकालाई प्रवासीहरुबाट करिब रु. आठ लाख सहयोग प्राप्त भएको छ ।
रोजगारी, पेशा, ब्यवसाय र अध्ययनको शिलशिलामा अस्टे«लीयामा रहेका जलजला जन्मथलो भएकाहरु आवद्ध पर्वत जलजला नेपाली कम्युनिटिले रु. सात लाख ८३ हजार तीन सय ५८ दशमलब पाँच सहयोग गरेको हो ।
अस्टे«लीयामा रहेका बिक्रम खत्रीको नेतृत्वमा संकलन गरिएको उक्त रकम जलजला गाउँपालिकाको विपद् कोषमा जम्मा भएको अध्यक्ष राजुप्रसाद आचार्यले जानकारी दिनुभयो । अध्यक्ष आचार्यले सहयोगदाताहरुलाई धन्यवाद दिदै विपद्बाट क्षति पुगेका निजी आवास र भौतिक पूर्वाधार पुनःनिर्माणमा परिचालन गरिने बताउनुभयो ।
बाढीपहिरोबाट जलजलामा एक सय २६ घर पूर्ण र ५० घर आंशिक रूपमा क्षति भएका छन् । थप एक ४० घर जोखिममा रहेका गाउँपालिकाले विवरण संकलन गरेको छ । फर्से, लामाखेत, ताङवाङ, खानीगाउँ, पालसीङ बढी प्रभावित भएका छन् । तटीय क्षेत्रमा कटान र बाढीको जोखिम बढेको छ ।
गाउँपालिका उपाध्यक्ष दिपक आचार्यले बाढीपहिरो प्रभावितको पुनर्वास र पुनर्निर्माणका लागि अल्पकालीन तथा दीर्घकालीन योजना बनाइएको बताउनुभयो । “तत्कालका लागि जस्तापाता, भाँडाकुँडा, लत्ताकपडा र खाद्यान्न उपलब्ध गराएर अस्थायी टहरा बनाई बसोबासको व्यवस्था मिलाउने योजना छ,” उहाँले भन्नुभयो, “दीर्घकालीन रूपमा सरकारको नीतिअनुसार निजी आवास र क्षतिग्रस्त भौतिक संरचनाको पुनर्निर्माण गर्नेछौँ ।”
उहाँका अनुसार निजी आवाससँगै क्षतिग्रस्त सडक, खानेपानी, सिँचाइ र विद्यालय भवन पुनर्निर्माण तथा जोखिममा रहेका बस्तीको संरक्षण गर्नुपर्नेछ । बाढीपहिरो नियन्त्रणका लागि आवश्यक आर्थिक स्रोत जुटाउन सङ्घीय तथा प्रदेश सरकार, दातृ निकाय र दातासँग समन्वय भइरहेको उहाँले बताउनुभयो ।
