धौलागिरि खबर

घान्द्रुक देउरालीको डडेलो नियन्त्रणका लागि छ समूह परिचालन

बेनी । म्याग्दी र कास्कीको अन्नपूर्ण गाउँपालिकाको सिमानामा पर्ने पर्यटकीय स्थल घान्द्रुक देउरालीको जंगलमा लागेको डडेलो नियन्त्रणका लागि छ वटा समूह परिचालन भएका छन् ।

म्याग्दी र कास्कीका तीन÷तीन वटा समूहले शुक्रबारदेखि आगोलागी नियन्त्रणमा लिनका लागि काम गरिरहेका अन्नपूर्ण संरक्षण क्षेत्र (एकयाप)को घान्द्रुक स्थित इलाका संरक्षण कार्यालयले जनाएको छ ।

संरक्षण अधिकृत शैलेन्द्र यादवले म्याग्दीको खिवाङका ३०, चित्रेका १३, घोरेपानीका १७, कास्कीको घान्द्रुकका २०, छोमरुङका ११ र दाङसिङका १२ जनाको टोली डडेलो नियन्त्रणमा खटिएका जानकारी दिनुभयो ।

संरक्षण क्षेत्र ब्यवस्थापन समिति, पर्यटन उपसमिति, युवा क्लव, आमा समूह, नेपाल प्रहरीको सहयोगमा डडेलो नियन्त्रण गर्न ग्यालीनमा पानी बोक्ने, माटो थुपार्ने, अग्नी रेखा बनाउने लगायतका काम गरिएको छ ।

छोमराङको टोलीले दोबाटो, दाङसिङकाले उल्लेरी माथिको नांगीठाटी, टाढापानी फेदी तथा म्याग्दी र घान्द्रुकको टोलीले देउराली क्षेत्रमा आगो निभाउने काम गरिरहेका छन् । म्याग्दीको अन्नपूर्ण गाउँपालिकाका अध्यक्ष डमबहादुर पुनको नेतृत्वमा आगो निभाउने काम भैरहेको छ ।

पुष १२ गते राती सुरु भएको डडेलो शनिबार दिउँसोम्म थप फैलिन रोकिएको अधिकृत यादबले बताउनुभयो । कास्कीको घान्द्रुकबाट सुरु भएको डडेलोले ठूलो क्षति पु¥याएको छ । सल्ला, गुराँस र जरबुटाको रुख भएको जंगल डढेलोले सखाप पारेको घोरेपानी टोल सुधार समितिका अध्यक्ष बिरेन गर्बुजाले बताउनुभयो ।

डडेलोका कारण बन्यजन्तु र पंक्षीको बासस्थानमा असर परेको छ । काठ, दाउरा, घाँस, बोटबिरुवा र जडिबुटि जलेर नष्ट भएको छ । अन्नपूर्ण संरक्षण क्षेत्र आयोजना (एक्याप) भित्र पर्ने घान्द्रुक देउराली क्षेत्रमा ठूलो जंगल छ ।

वन्यजन्तुको शिकार गर्न र चरनका लागि घाँस पलाउने गलत बुझाइका कारण डडेलो लगाउने गर्छन् । गत कात्तिक महिनायता बर्षा नहुँदा बनजंगल सुख्खा भएका छन् । सुख्खायामको समयमा बनमा डडेलो लाग्ने समस्या बढी हुने गरेको छ ।

प्रतिक्रिया दिनुहोस
Loading...