म्याग्देली पञ्चेबाजा दुबईमा गुञ्जियो, परदेशमा मौलिकताको सुगन्ध

Annapurna notice 3

परदेशको भूमिमा नेपाली गीत बज्छ, नेपाली मन नाच्छ। झिलिमिली शहर दुबईको व्यस्त जीवनबीच जब पञ्चेबाजाको धुन गुञ्जियो, त्यहाँ उपस्थित म्याग्देली मात्र होइन, नेपाली समुदाय नै आफ्नै गाउँघरको आँगनमा पुगेझैँ भावुक र उत्साहित बन्यो।

विदेशमा रोजगारी र व्यवसायको सिलसिलामा बस्दै आएका म्याग्देलीहरूले आफ्नो माटो, संस्कृति र मौलिकताको सम्झना बोकेर म्याग्देली पञ्चेबाजा दुबईमा भित्र्याएका छन्।

म्याग्दी प्रवासी नेपाली संघ राष्ट्रिय कार्यकारी समिति युएई (मोना युएई)ले श्रावण ३१ गते दुबईको बरदुबईस्थित गाउँबेँसी रेस्टुरेन्टमा विशेष कार्यक्रम आयोजना गरी म्याग्देली पञ्चेबाजाको औपचारिक शुभारम्भ गरेको हो।

Shreekrishna

परदेशमा बसे पनि आफ्नो मौलिक संस्कृति र परम्परागत बाजागाजाको संरक्षण गर्ने तथा नयाँ पुस्तालाई नौमती पञ्चेबाजाको मौलिकतासँग जोड्ने उद्देश्यले यो अभियान थालिएको मोना युएईले जनाएको छ।

कार्यक्रममा मोना युएईका अध्यक्ष काजिमान बुढाथोकी मगर र संस्थापक अध्यक्ष प्रदीप सुवेदीले पञ्चेबाजाको विधिवत् पूजा–आजा गरी शुभारम्भ गर्नुभयो। पश्चिम नेपालको धौलागिरि क्षेत्रमा पुस्तौँदेखि विवाह, व्रतबन्ध, धार्मिक तथा सांस्कृतिक समारोहमा गुञ्जिँदै आएको पञ्चेबाजालाई युएईको नेपाली समुदायमाझ नयाँ पहिचानसहित प्रस्तुत गर्ने प्रयासका रूपमा यसलाई लिइएको छ।

दुबईमा गाउँघरको झल्को

पञ्चेबाजा बज्न थालेपछि गाउँबेँसी रेस्टुरेन्टको माहोल एकाएक बदलियो। सनहीको मिठो धुनसँगै दमाहा, ट्याम्को, झ्याली र अन्य बाजाको ताल मिसिँदा दुबईको परदेशी वातावरण केही क्षणका लागि म्याग्दीको गाउँघरमा परिणत भएझैँ देखियो।

म्याग्देली नौमती पञ्चेबाजा समूहले प्रस्तुत गरेको धुनमा उपस्थित नेपालीहरू उत्साहका साथ नाचे। कसैले मोबाइलमा भिडियो बनाए, कसैले तालमा ताल मिलाए। परदेशमा भेटिएको आफ्नै गाउँको सांस्कृतिक पहिचानले धेरैको अनुहारमा खुसी ल्यायो।

समूहमा उत्कृष्ट सनहीवादक प्रकाश परियार, विष्णु परियार, रामु परियार, प्रवीण परियार, कमल परियार, मिलन परियार, सोनाम परियार, अनिल परियारलगायत कलाकार सहभागी छन्। उनीहरूले युएईमा आयोजना हुने विभिन्न नेपाली सांस्कृतिक तथा सामाजिक कार्यक्रममा म्याग्देली पञ्चेबाजाको प्रस्तुति दिनेछन्।

कार्यक्रममा अध्यक्ष बुढाथोकीले समूहका कलाकारलाई खादा लगाएर स्वागत तथा धन्यवाद व्यक्त गर्नुभयो।

DRM Notice 1

बाजा मात्रै होइन, पहिचान पनि

पञ्चेबाजा नेपाली समाजमा केवल मनोरञ्जनको साधन होइन। यो जन्मदेखि विवाहसम्म, धार्मिक संस्कारदेखि सामाजिक उत्सवसम्म जोडिएको मौलिक सांस्कृतिक सम्पदा हो।

विशेषगरी म्याग्दी, पर्वत, बागलुङलगायत धौलागिरि क्षेत्रमा पञ्चेबाजाको आफ्नै सांस्कृतिक महत्त्व छ। तर वैदेशिक रोजगारीका कारण ठूलो संख्यामा नेपाली युवा विदेशिएसँगै यस्ता मौलिक परम्परा नयाँ पुस्ताबाट टाढिँदै जाने चिन्ता पनि छ।

यही चिन्ताबीच मोना युएईले थालेको यो अभियानले परदेशमा रहेका नेपालीलाई आफ्नो संस्कृति सम्झाउने र नयाँ पुस्तालाई त्यससँग जोड्ने माध्यम बन्ने अपेक्षा गरिएको छ।

दुबईमा पञ्चेबाजाको सुरुवातसँगै अब नेपाली समुदायका विवाह, तीज, सांस्कृतिक कार्यक्रम तथा अन्य समारोहमा म्याग्देली धुन सुनिनेछ। यसले परदेशमा नेपालीपनलाई अझ जीवन्त बनाउने विश्वास आयोजकको छ।

तीजमा पनि गुञ्जिनेछ म्याग्देली धुन

मोना युएईले आगामी सेप्टेम्बर ६ मा आयोजना गर्ने विशेष तीज कार्यक्रममा पनि म्याग्देली पञ्चेबाजासहितको सांस्कृतिक प्रस्तुति रहने जनाएको छ। संस्थाले युएईमा रहेका सम्पूर्ण नेपाली समुदायलाई कार्यक्रममा उपस्थितिका लागि निमन्त्रणा गरेको छ।

युएईमा रहेका अन्य नेपाली संघसंस्थाले आफ्ना कार्यक्रमहरूमा म्याग्देली पञ्चेबाजा प्रस्तुत गर्न चाहेमा मोना युएईसँग सम्पर्क गर्नसमेत आग्रह गरिएको छ।

दुबईको व्यस्त शहरमा गुञ्जिएको पञ्चेबाजाको धुनले एउटा सन्देश दिएको छ—देश टाढा हुन सक्छ, तर आफ्नो संस्कृति र माटोको सम्झना टाढिँदैन।

म्याग्दीको पहाडमा पुस्तौँदेखि गुञ्जिँदै आएको पञ्चेबाजा अब हजारौँ किलोमिटर टाढाको दुबईमा पनि आफ्नै लयमा बज्न थालेको छ। यो केवल एउटा बाजाको यात्रा होइन, परदेशमा पनि म्याग्देली पहिचान, मौलिकता र नेपालीपन जोगाउने सांस्कृतिक अभियानको सुरुवात हो।

Annapurna rm notice 4
प्रतिक्रिया दिनुहोस
Loading...