म्याग्दी, ः म्याग्दीको मालिका गाउँपालिका–७ बिमको तल्लो र डाँडागाउँको पदमार्गलाई पक्की बनाइएको छ ।
गाउँको सौन्दर्यकरणका लागि बस्तीभित्रको कच्ची पैदलमार्गलाई ढलान गरेर पक्की बनाइएको हो । डाडागाउँकी मंगली पुनले पक्की पदमार्ग निर्माण भएपछि हिलो र धुलोको समस्या हट्नुका साथै गाउँ सफा सुग्घर भएको बताउनुभयो ।
“उकालो, ओरालोमा हिँडडुल गर्दा चिप्लिएर लड्ने, भारी बोकेर हिँड्न गाहे भएको थियो”, उहाँले भन्नुभयो, “पक्की पदमार्गले गाउँलाई सफा र स्थानीयवासीलाई सहज बनाएको छ ।” बर्खामा झाडीमा भिज्दै हिड्नुपर्ने समस्या हटेको र सर्पले टोक्ने जोखिम घटेको पुनले बताउनुभयो ।
पदमार्ग बनेपछि बिम र डाँडागाउँमा दुई सय भन्दा बढी घरधुरी लाभान्वित भएका छन् । बालबालिका र ज्येष्ठ नागरिकलाई आवतजावत र हिँडडुल गर्न सहज भएको छ । गण्डकी प्रदेश सरकारको सहयोगमा आर्थिक वर्ष २०८०÷०८१ देखि शुरु भएको पदमार्ग निर्माण कार्यलाई चालु आर्थिक वर्षमा पूर्णता दिइएको हो ।
पहिलो वर्ष पूर्वाधार विकास कार्यालय मार्फत बिनियोजन भएको रु. ३० लाख बजेटबाट बिम तल्लोगाउँमा चार सय २५ र डाँडागाउँमा दुई सय ५० मिटर पदमार्ग निर्माण भएको थियो । आर्थिक वर्ष २०८१÷०८२ मा रु. १० लाख बजेटबाट तल्लो गाउँमा दुई सय ९० मिटर नाली र त्यसमाथी पक्की पदमार्ग बनाइएको एकिकृत सेवा कार्यालयका इञ्जिनियर सुमन बोगटीले बताउनुभयो ।
उहाँका अनुसार चालु आर्थिक वर्षमा एकिकृत सेवा कार्यालय मार्फत बिनियोजन भएको रु. १० लाख बजेटबाट डाडाँगाउँमा पाँच सय ५० मिटर पदमार्ग निर्माण भएको छ । तेर्सोमाढुङ्गा बिछ्याएर र उकालोमा सिँढी चिनेर ढलान गरिएको छ ।
एक दशमलव १० मिटरदेखि एक दशमलव २० मिटर फराकिलो पदमार्ग निर्माण भएको छ । पदमार्गमा मोटरसाइकल र साइकल पनि हिँडाउन सकिने डाडाँगाउँ पदमार्ग निर्माण समितिका अध्यक्ष भलाराम जुग्जालीले बताउनुभयो ।
माटे पदमार्गमा बर्सात हुँदा हिलो र सुक्खामा धुलोको समस्या थियो । ढलान गरेको पदमार्ग सरसफाइ गर्न सहज भएको तल्लोगाउँका धनकुमार जुग्जालीले बताउनुभयो । तल्लोगाउँमा पदमार्ग निर्माणका लागि चालु आर्थिक वर्षमा एकिकृत सेवा कार्यालय मार्फत बिनियोजन भएको रु. पाँच लाख बजेट भने इन्धन र निर्माण सामग्रीको मूल्य वृद्धिका कारण कार्यान्वयन गर्न नसकिएको उहाँले बताउनुभयो ।
बिम र डाँडागाउँ धार्मिक पर्यटकीय स्थल मालिका र प्रभु चेला धुरीको फेदीका बस्ती हुन् । मालिका र प्रभुचेला जाने पर्यटक तथा भक्तजन बसोबास गर्ने बिम र डाँडगाउँको पृष्ठभूमिमा गुर्जा हिमालको मनमोहक दृष्य अवलोकन गर्न सकिन्छ ।
सरसफाइमा नमूना बनाउने उद्देश्यले गाउँभित्रको पैदलमार्गलाई पक्की बनाउन बजेट बिनियोजन गरेको स्थानीयवासीसमेत रहनुभएका गण्डकी प्रदेशसभा सदस्य रेशमबहादुर जुग्जालीले बताउनुभयो ।
प्रदेश सरकारका पुर्व भौतिक पूर्वाधार विकास तथा यातायात व्यवस्थामन्त्री समेत रहनुभएका जुग्जालीले स्तरोन्नतिको क्रममा रहेको खारा–बिम सडक स्तरोन्नति योजना मार्फत तल्लोगाउँ र डाडाँगाउँ बस्तिभित्रको सडक कालोपत्र हुने जानकारी दिनुभयो ।
