बेनी, ः म्याग्दीको मङ्गला गाउँपालिका–२ कोत्रवाङका एक दम्पत्तीको सहयोगमा सडक बक्ति जडान भएको छ ।
हालै बिवाह बन्धनमा बाँधिएका कोत्रवाङका प्रकाश खत्री र राधिका धिताल खत्रीले व्यक्तिगत लगानीमा सडक बक्ती जडान गरिदिनुभएको हो । सडक वत्ति जडान भएपछि रातको समयमा उज्यालो हुँदा हिडडुल गर्न सहज, सुरक्षित महशुस र चितुवा लगायत वन्यजन्तुको आवत जावत घटेको कोत्रवाङ टोल सुधार संस्थाका अध्यक्ष पूर्णबहादुर विश्वकर्माले जानकारी दिनुभयो ।
“नवदम्पत्तीलाई टोल सुधार समिति र स्थानीय बिहानी आमा समूहले सडक वत्तीको आवश्यकता दर्शाएका थियौ,” उहाँले भन्नुभयो “हाम्रो प्रस्ताव स्विकार गरि प्रकाश र राधिकाले १४ वटा ३० वाट र तीन वटा ५० वाट क्षमताको सडक वत्ती, तार लगायतका सबै सामग्री व्यक्तिगत खर्चमा उपलब्ध गराउनुभयो ।”
मङ्गला गाउँपालिकाले विजुलीको पोल बाहेकका ठाउँमा सडकबत्ती राख्न तीन वटा पोल उपलब्ध गराएको छ । टोल सुधार समितिका अध्यक्ष विश्वकर्माले दुई दिन लगाएर बत्ती जडान गर्नुभएको हो । सिम, कोत्रवाङ, कुहुँ जाने सडक र काफलचौरको झोलुङ्गे पुलसम्म बक्ति जडान गरिएको छ ।
रात परेपछि बल्ने र उज्यालोमा निभ्ने स्वचालित सडक बत्ती जडान भएको छ । यसअघि रातको समयमा चितुवा बस्तिमा पस्ने गरेको थियो । झलमल्ल भएपछि चितुवा बस्ति पस्न डराएको र स्थानीयबासी ढुक्क भएका टोल सुधार समितिका अध्यक्ष विकले बताउनुभयो । कोत्रवाङमा २२ घरपरिवारको बसोबास छ ।
प्रकाशका बुवा चित्रबहादुर र दाजु विकास खत्रीले यसअघि कोत्रवाङ हुदै ताराखेत जोड्ने पदमार्ग निर्माण गर्नुभएको थियो । सडक वत्ती र पदमार्गले कोत्रवाङ, तोराखेत, काफलचौर, भाइवाङ, सल्यान, भरजुला, पैयुपाँटा, कुहुँका बासिन्दालाई पनि सहज भएको छ ।
