बेनी। म्याग्दीको धवलागिरी गाउँपालिका–४ मुदीमा अवस्थित धौलागिरी हिमालको आरोहण दिवस म्याग्दीमा मनाइने भएको छ ।
संसारका सातौँ अग्लो धौलागिरि हिमालमा पहिलोपटक मानव पाइला पुगेको दिनको अवसरमा मुदी गाउँमा ‘धौलागिरि आरोहण दिवस’ मनाउन लागिएको हो । यही वैशाख ३० गते धौलागिरि हिमालमा पहिलोपटक मानव पाइला पुगेको ६६ वर्ष पूरा हुँदैछ ।
सन् १९६० मे १३ मा स्विस–अस्ट्रियन संयुक्त आरोहण दलका म्याक्स आइसेलिनको नेतृत्वमा गएका दुई नेपालीसहित सात जना आरोहीले धवलागिरि हिमालको सफल आरोहण गरेका थिए । सोही दिनको सम्झनामा हरेक वर्ष मे १३ तारिखमा धौलागिरि आरोहण दिवस मनाउने गरिएको छ ।
ट्रेकिङ ऐजिन्सिज एसोसिएसन अफ नेपाल (टान) गण्डकीको आयोजना, गण्डकी प्रदेशको उद्योग तथा पर्यटन मन्त्रालय, नेपाल पर्यटन बोर्डको प्रवद्र्धन र धौलागिरि गाउँपालिकाको समन्वयमा उक्त दिवस मनाउन लागिएको हो ।
विगतका बर्षहरुमा पोखरा लगायतका स्थानमा धौलागिरी आरोहण दिवस मनाउने गरिएकोमा यस पटक गाउँपालिकाको समन्वय र पर्यटन क्षेत्रमा क्रियाशिल टान गण्डकीको आयोजनामा मुदी गाउँमै दिवस मनाउन लागिएको धवलागिरी गाउँपालिकाका अध्यक्ष प्रेमप्रसाद पुनले जानकारी दिनुभयो ।
उहाँका अनुसार, हिमाल अवस्थित रहेकै वडामा दिवस मनाउँदा यसले धौलागिरीको महत्वलाई फैलाउन र धौलागिरी पदमार्गको प्रचार प्रसारमा समेत सघाउ पुग्ने विश्वास गरिएको छ । गत वर्ष पोखरामा ‘धौलागिरि पदयात्रा, समस्या, चुनौती र समाधान’ विषयक अन्तक्र्रियासहित सो दिवस मनाइएकामा यसपटक धौलागिरी हिमाल अवस्थित रहेकै स्थान मुदी गाउँमा यो दिवस मनाइन लागिएको टान गण्डकीका अध्यक्ष कृष्णप्रसाद आचार्यले जानकारी दिनुभयो ।
“६६औँ धौलागिरि आरोहण दिवससहित धौलागिरि गाउँपालिकाका पर्यटकीय गन्तव्य तथा पदमार्ग प्रवद्र्धन कार्यक्रम एकैसाथ गर्दैछौँ”, उहाँले भन्नुभयो, “दिवसको औपचारिक समारोहमा धवलागिरि हिमाल आरोहण गरेका आरोहीलाई सम्मान गरिनेछ ।”
