बेनी ः धवलागिरी गाउँपालिकामा निर्माण हुन लागेको छ दशमलब पाँच मेगावाट क्षमताको दरखोला जलविद्युत आयोजनाका लागि लगानीको स्रोत जुटेको छ ।
दरखोला हाइड्रोपावर लिमिटेड प्रर्वद्धक रहेको रु. एक अर्ब ३० करोड लागत अनुमान गरिएको आयोजनामा एनएमबी बैंकले लगानी गर्ने टुङ्गो लागेको हो । बैंकको ७० प्रतिशत अर्थात रु. ९१ करोड र आन्तरिक स्वपुँजी रु. ३९ करोड रहने गरि वित्तीय स्रोत ब्यवस्थापन सम्झौता भएको दरखोला हाइड्रोपावरका अध्यक्ष रेशम भण्डारीले जानकारी दिनुभयो ।
धवलागिरी गाउँपालिका–३ मुनाको कुनौटामा प्रस्तावित बाँधका साथै सोलवाङ स्थित म्याग्दी र दरखोलाको दोभानमा निर्माण हुने विद्युतगृहसम्म पहुँचमार्ग पु¥याइएको छ । कुनौटो देखि विद्युतगृह तर्फ पेनस्टक पाइप राख्ने ठाउँ बनाउन सडक निर्माण र विस्तारको काम भैरहेको छ ।
विद्युतगृहसम्म पानी लैजान चार किलोमिटर पाँच सय मिटर लामो पेनस्टक पाइपलाइन जडान गरिने अध्यक्ष भण्डारीले बताउनुभयो । कुनौटामा ३० मिटर लामो बालुवा थिग्राउने पोखरी डिसेण्डर निर्माण हुनेछ् ।
पाँच सय ४८ मिटर उचाईबाट विद्युतगृहमा पानी खसालेर उत्पादन गरिने विद्युत सात किलोमिटर लामो प्रशारण लाइन बनाएर डाडाखेत सबस्टेशनमा लगेर राष्ट्रिय प्रशारण प्रणालीमा आवद्ध गराउने योजना छ ।
सम्भाव्यता अध्ययन, प्रारम्भिक वातावरणीय प्रभाव मूल्याङ्कन, विद्युत खरिद बिक्री सम्झौता, जग्गा खरिद र बित्तीय स्रोत व्यवस्थापनको काम सकिएको आयोजनाका प्रमुख उपेन्द्र घिमिरेले बताउनुभयो । रन अफ द रिभर (नदी प्रवाहमा आधारित) प्रकृतिको यस आयोजनाले सिभिल, हाइड्रोमेकानिलक र इलेक्ट्रोमेकानिल ठेकेदार छनौटको अन्तिम चरणमा रहेको छ ।
नेपाल विद्युत प्राधिकरणसँग वि.स. २०८० मा विद्युत खरिद बिक्री सम्झौता भएको थियो । सम्झौता अनुसार हिउँदमा प्रतियुनिट रु. ८.४० र बर्खामा प्रतियुनिट रु. ४.८० का दरले विद्युत खरिद बिक्री हुनेछ् । वि.स. २०८४ चैत महिनासम्म विद्युत उत्पादन गर्ने लक्ष्य राखिएको छ ।
