बेनी, ः म्याग्दीको बेनी नगरपालिकाले यस वर्ष एक वटा विद्यालय बन्द, १५ विद्यालयको कक्षा घटुवा तथा तहमिलान गरेको छ ।
विद्यार्थी अभावका कारण बेनी नगरपालिका–५ मा रहेको चेतना आधारभूत विद्यालय बन्द भएको हो । कक्षा घटुवा, तह मिलान र बन्द भएका विद्यालयका ३२ जना शिक्षकहरुलाई विद्यार्थी संख्या बढी भएका विद्यालयहरुमा ब्यवस्थापन गरिएको बेनी नगरपालिकाका प्रमुख प्रशासकीय अधिकृत अर्जुन शर्माले बताउनुभयो ।
१–३ तहको पठनपाठन हुदै आएको चेतना आधारभूतमा नयाँ भर्ना हुने विद्यार्थी नभएकाले बन्द भएको गरिएको नगरपालिकाले जनाएको छ । यसअघि गत वर्ष बेनपा–५ माथिल्लो गाजनेको जगन्नाथ आधारभूत र वडा नं.–१० को ओखले आधारभूत विद्यालय बन्द भएका थिए ।
१–३ तहको पठनपाठन हुने बेनपा–१ को ज्ञानपुञ्ज, २ को हंशबाहिनी, वडा नं.–३ को नवज्योती र भूमे आधारभूतमा बालकक्षा मात्र कायम भएको नगरपालिकाले जनाएको छ । रत्नेचौरको भानु मा.बि.लाई १–१२ बाट १–८, गलेश्वरको जडभरत संस्कृति माविलाई १–१० बाट १–८, थाकनपोखरी र राधाकृष्ण आधारभूतलाई १–८ बाट १–५ मा झारिएको छ ।
१–५ तहका बराह, ज्ञानपुञ्ज, नवदुर्गा, विद्यामन्दिर, बरनाथ, स्यालीखेत र चन्द्रोदय आधारभूत विद्यालयमा १–३ कक्षा कायम भएको छ । नगरप्रमुख सुरत केसीले ‘जहाँ विद्यार्थी, त्यहाँ शिक्षक’ भन्ने १७ औ नगरसभाको निर्णय अनुसार विद्यार्थी संख्या कम भएका विद्यालयका शिक्षकहरुको दरबन्दी बढी विद्यार्थी संख्या भएका विद्यालयलाई उपलब्ध गराएको बताउनुभयो ।
“गत भदौ महिनामा कार्यदल बनाएर विद्यालयहरुको स्थलगत अनुगमन, विषयगत समिति, समुदाय र वडा स्तरमा विभिन्न चरणमा भएको छलफलमा प्राप्त सुझाव अनुसार गत चैत २७ गतेको कार्यपालिका बैठकले गरेको विद्यालयको तह र कक्षा कटुवा तथा शिक्षक ब्यवस्थापनको निर्णय नयाँ शैक्षिकसत्रको सुरुवातसँगै कार्यान्वयनका लागि पत्राचार गरिसकेका छौ,” उहाँले भन्नुभयो “अहिले तह र कक्षा घटाइएका विद्यालयमा विद्यार्थी संख्या भएमा तह र कक्षा थप गर्ने नीति लिएका छौ ।”
कार्यपालिकाले गरेको तह अनुसारको प्रअ नियुक्ती गर्नका लागि पनि विद्यालयहरुलाई पत्राचार गरिएको नगरपालिकाको शिक्षा शाखाका उपसचिव क्षेत्रबहादुर भण्डारीले बताउनुभयो । माविमा मावि, १–८ तहको आधारभूतमा निमावी र १–५ को आधारभूतमा प्रा.वि. तहका माथिल्ला बरियताक्रममा रहेका शिक्षक प्रअ हुने गरि शिक्षकहरुलाई ब्यवस्थापन गरिएको उहाँले बताउनुभयो ।
बन्द भएका विद्यालयहरुको भौतिक सम्पत्तिको मूल्याङ्कन गर्न उपसमिति गठन भएको र उक्त सम्पत्ती तथा कागजात नजिकको विद्यालयमा राखिने नगरपालिकाले जनाएको छ । दोस्रो चरणमा तह समायोजन र पुलमा रहेका शिक्षकहरुलाई विषयगत रुपमा आवश्यकताको आधारमा विद्यालयमा खटाउने तयारी नगरपालिकाले गरेको छ । बेनी नगरपालिकामा ५५ वटा सामुदायिक विद्यालय छन् ।
सुविधायुक्त भवन, इन्टरनेट, विद्युत्, खानेपानी, शौचालय, कम्प्युटरसहितका पूर्वाधार उपलब्ध भए पनि बसाइँसराइका कारण ग्रामीण भेगका सामुदायिक विद्यालयमा बर्सेनि विद्यार्थी संख्या घट्दै गएको छ । कक्षा सञ्चालनका लागि आवश्यक विद्यार्थी संख्या नपुगेपछि शैक्षिक सत्र २०७९ मा ११ र २०८० मा सात वटा विद्यालयको तह समायोजन (कक्षा घटुवा) गरिएको थियो ।
तीव्र बसाइँसराइ, निजी विद्यालयतर्फको आकर्षण, अभिभावकको विश्वास जगाउन नसक्नु, अंग्रेजी माध्यमबाट पठनपाठन गर्नु नसक्नुले सामुदायिक विद्यालय संकटमा पर्न थालेका छन् भने विषयगत शिक्षक नपाउनु अर्को समस्या बनेको छ ।
