बेनी। नेपाली कम्युनिष्ट पार्टी (नेकपा)ले आगामी फागुन २१ गते हुन लागेको प्रतिनिधीसभा सदस्य निर्वाचनका लागि म्याग्दीमा युवा नेता अर्जुन थापालाई उमेद्वार बनाएको छ ।
नेकपा म्याग्दीका नेता सेरबहादुर केसीले पार्टीको तर्फबाट थापालाई उमेद्वार बनाउने निश्चित भएको जानकारी दिनुभयो । थापा टिकट लिनका लागि काठमाडौ जानुभएको छ । ११ बजे थापालाई संयोजक पुष्पकमल दाहाल (प्रचण्ड)ले टिकट हस्तान्तरण गर्नका लागि पार्टी कार्यालय बोलाउनुभएको छ । ४२ वर्षीय थापा धवलागिरी गाउँपालिका–७ धारापानी निवासी हुनुहुन्छ ।
वि.स. २०५६ मा शिवाङको हेम (नमुना आवासीय) माविमा अनेरास्ववीयु क्रान्तिकारीको प्रारम्भिक कमिटिको अध्यक्ष बनेर राजनीतिक यात्रा शुरु गरेका थापा अध्ययनको क्रममा काठमाडौमा रहँदा भक्तपुरमा अखिल क्रान्तिकारीको नेतृत्व गर्नुभएको थियो ।
लामो समय विद्यार्थी राजनीतिमा काम गरेका थापा पछिल्लो पटक साविक नेकपा माओवादी केन्द्रको विशेष प्रदेश समन्वय समितिको सचिवालय सदस्यको जिम्मेवारीमा हुनुहुन्थ्यो । राजनीतिशास्त्रमा स्नाकोत्तर गरेका थापाको नेतृत्वमा काठमाडौमा स्वतन्त्र रक्तदाता समूहले बिरामीहरुलाई निशूल्क रगतको ब्यवस्था मिलाउदै आएको छ ।
५२ पटक रक्तदान गरेका थापाको समुहले १० हजार जना भन्दा बढी बिरामीलाई उपचारका लागि निशूल्क रगतको व्यवस्था मिलाएको छ । बुवा र आमाको नामबाट चन्द्रलोक शैक्षिक कोष स्थापना गरेर धवलागिरी गाउँपालिकाका ११ वटा माध्यमिक विद्यालयमा पछिल्लो तीन वर्षयता विपन्न, गरिब र जेहेन्दार विद्यार्थीहरुलाई शैक्षिक सामग्री वितरण गर्दै आउनुभएको छ ।
नेपाली कम्युनिष्ट पार्टीले म्याग्दीबाट थापा सहित कृष्णकुमार विश्वकर्मा, गमबहादुर श्रीसमगर, टेकबहादुर बिक र दुर्गा कार्की बानियाको नाम उमेद्वारका लागि सिफारिस गरेको थियो । नवयुवा पुस्ता आन्दोलनको मर्म र भावना अनुसार युवा उमेद्वार बनाएको नेकपा म्याग्दीका नेता गोविन्द पौडेलले बताउनुभयो ।
“विनोद केसी, रेशम जुग्जाली (सुविन), हरि भण्डारी जस्ता युवाहरुलाई प्रदेशमा सांसद बनाएर पठाउँदा संसद र सरकारमा म्याग्दीको लागि हस्तक्षेपकारी भूमिका निर्वाह गरेर युवाले अवसर पाएमा काम गर्न सक्छन भन्ने ब्यवहारिक रुपमा पुष्टि गर्नुभएको छ,” संविधानसभा सदस्य समेत रहेका उहाँले भन्नुभयो “संघीय संसदमा पनि राजनीतिक र विकासका हिसाबले हस्तक्षेप गर्न सक्ने शैक्षिक योग्यता र राजनीतिक अनुभव हाँसिल गरेका अर्जुन थापालाई उमेद्वार बनाएका हौ ।”
थापालाई जिताउन नेकपाका नेताहरु एकजुट भएर केन्द्रित हुने पौडेलले बताउनुभयो । गण्डकी प्रदेशका पुर्वमन्त्री तथा युवा नेता रशेम बहादुर जुग्जाली (सुविन)को नेतृत्वमा म्याग्दीमा निर्वाचन परिचालन समिति गठन भएको छ ।
बेनी नगरपालिकामा गोविन्द पौडेल, मंगलामा गमबहादुर श्रीस, मालिकामा लालु किसान, धवलागिरीमा टेकबहादुर बिक, रघुगंगामा कृष्णकुमार विश्वकर्मा र अन्नपूर्णमा सेरबहादुर केसीको नेतृत्वमा चुनाव परिचालनको जिम्मेवारी दिइएको छ । प्रदेश सांसद जुग्जाली र अर्का सांसद हरि भण्डारीले जिल्लाभरको चुनावी अभियानमा खटिने गरेर जिम्मेवारी दिएको जिल्ला संयोजक केसीले बताउनुभयो ।
