बेनी, पहिरोका कारण बेनी–जोमसोम सडकको म्याग्दी खण्ड सोमबार बिहानैदेखि अवरुद्ध भएका छन् ।
बेनी–जोमसोम म्याग्दीको लाइफलाइन सडक हो । सडक अवरुद्ध हुँदा स्थानीयबासीका साथै पर्यटकहरु प्रभावित भएका छन् ।
रघुगङ्गा गाउँपालिका–२ बैसरी, माझखर्क, अन्नपूर्ण गाउँपालिका–२ भुरुङ्गभिर, ३ सुकेबगर र काभ्रेभिरमा खसेको पहिरोका कारण बेनी–जोमसोम सडक अवरुद्ध भएको जिल्ला ट्राफिक प्रहरी कार्यालय म्याग्दीले जनाएको छ ।
कार्यालयका प्रमुख प्रहरी सहायक निरीक्षक बिशाल दर्जीका अनुसार बेनी–जोमसोम सडकको पहिरो पन्छाउन सडक विभागले डोजर परिचालन गरेको छ । बर्षा नरोकिएको र निरन्तर पहिरो खसेकाले सडक खुुलाउन समस्या भएको छ ।
पहिरोले सडक बेनी–जोमसोम सडक अन्तर्गतको भुरुङ्गभिर खण्डमा पहिरो खसेपछि अन्नपूर्ण गाउँपालिका–२ भुरुङ्गतातोपानीमा रहेको सर्वोदय मावि सोमबार बन्द भएको छ । पोखरेबगर, ठूलोबगर, सुनारीका विद्यार्थीहरु पहिरोका कारण विद्यालय आउन नसकेपछि पठनपाठन बन्द गरिएको विद्यालयका सहायक प्रअ शिवराम पौडेलले बताउनुभयो ।
