बेनी,। मानवअधिकार तथा शान्ति समाज जिल्ला शाखा म्याग्दीले बिहीबार आणबिक हतियार निषेध सन्धीमा गरेको हस्ताक्षर सिघ्र अनुमोदन गर्न माग गर्दै जिल्ला प्रशासन कार्यालय म्याग्दीमा धर्ना बसेका छन् ।
७२ औ अन्तराष्ट्रिय मानव अधिकार दिबसका अवसरमा समाजको देशब्यापी कार्यक्रम अनुसार दिउँसो १२ बजेदेखि ३० मिनेट बेनीको प्रशासन कार्यालय अगाडी धर्ना बसेका हुन् । आणविक अस्त्रको विश्वब्यापी उन्मुलनका लागि नेपालले गरेको सन्धी सरकारले अनुमोदन गर्नुपर्ने लगायत १० बुदे माग सहित धर्ना बसेका थिए ।
“आणबिक अस्त्र रहेसम्म यो प्यारो घर्तिमा कोही सुरक्षित छैनन्” भन्ने मुल नाराका साथ आयोजना गरिएको धर्नामा सहभागिहरुले अमेरिका, रुस, ब्रिटेन, फ्रान्स, पाकिस्तान, उत्तर कोरीया र इजरायलले भण्डारण गरेको आणबिक अस्त्र नष्ट गर्न विश्वब्यापी रुपमा दवाव सिर्जना गर्नुपर्ने बताएका थिए ।
समाजका निबर्तमान केन्द्रीय बरिष्ठ उपसभापति तथा धर्ना कार्यक्रमका संयोजक राम्जीप्रसाद सुबेदीले आणबिक हतियार अहिले बिश्वब्यापी महामारी बनेको कोरोना (भाइरस) भन्दा पनि ठूलो जोखिम भएकाले यसलाई तत्काल नष्ट गर्नुपर्न बताउनुभयो ।
निबर्तमान शाखा सभापति मुक्तिप्रसाद ढुङ्गानाले विश्व शान्तिको मुख्य चुनौति आणबिक हतियार भएकाले यसलाई नष्ट गर्न आणबिक अस्त्र सञ्चय गरेका देशहरुलाई दबाव सिर्जना गराउनुपर्ने आवश्यकता रहेको बताउनुभयो ।
शाखा सभापति नवराज पौडेलको नेतृत्वमा भएको कार्यक्रममा सचिव हरिप्रसाद पौडेलले आणबिक अस्त्रको इतिहास, असर र नष्ट गर्नुपर्ने आवश्यकताको बिषयमा समाजको अबधारणापत्र बाचन गर्नुभएको थियो ।
