७४ जनाको मोतियाबिन्दुको शल्यक्रिया
बेनी, म्याग्दीको मालिका गाउँपालिका–६ दरवाङमा बुधबार सम्पन्न निशूल्क आँखा उपचार तथा शल्यक्रिया शिविरमा सात सय जना भन्दा बढी लाभान्वित भएका छन् ।
अपर म्याग्दी हाइड्रो लिमिटेडको आर्थिक, हिमालयन आँखा अस्पताल पोखरा र नेत्रज्योती संघ म्याग्दीद्धारा सञ्चालित आँखा उपचार केन्द्र बेनीको प्राविधिक सहयोगमा मालिका गाउँपालिका र पश्चिम नेपाल बचत तथा ऋण सहकारी संस्थाले आयोजना गरेको शिविर तीन दिनसम्म सञ्चालन भएको थियो ।
शिविरमा सात सय १४ जनाले सेवा लिएका आँखा उपचार केन्द्र म्याग्दीका नेत्र अधिकृत दिनेश बानियाले जानकारी दिनुभयो । ७४ जना मोतियाबिन्दुका बिरामीको निशूल्क शल्यक्रिया पनि गरिएको उहाँले बताउनुभयो ।
हिमालयन आँखा अस्पताल पोखराका नेत्र चिकित्सक डा. हरिबिक्रम अधिकारी, बाह्य कार्यक्रम संयोजक सुवास नेपाल, नेत्र अधिकृत बानिया, दरवाङ आधारभूत अस्पताल र मालिका गाउँपालिकाका स्वास्थ्यकर्मीहरुले आँखा परिक्षण, परामर्शका साथै निशूल्क चश्मा र औषधी वितरण सम्बन्धी सेवा दिनुभएको थियो ।
नेपाल रेडक्रस सोसाइटीको दरवाङ उपशाखाले व्यवस्थापन गरेको शिविरमा मालिका, धवलागिरी, मंगला गाउँपालिका र बेनी नगरपालिकाका सर्वसाधारणले सेवा लिएका छन् । यसअघि गत हप्ता धवलागिरी गाउँपालिकाको मल्कवाङ, मराङ, मुना र धारापानी तथा बेनी नगरपालिकाको अर्थुङ्गेमा गरिएको आँखा उपचार शिविरमा करिब नौ सय जनाको आँखा परिक्षण भएकोमा ३२ जना मोतियाबिन्दुका बिरामी पहिचान भएका थिए ।
३२ जना मध्य २० जनाले दरवाङको शिविरमा आएर मोतियाबिन्दुको शल्यक्रिया गरेका नेपाल नेत्रज्योती संघ म्याग्दीका अध्यक्ष अमर बानियाले जानकारी दिनुभयो । शिविरबाट ग्रामिण क्षेत्रमा रहेका आँखाका बिरामीहरु पहिचान गरि उपचारमा पहुँच, बर्षौपछि आँखाको ज्योति फर्किदा दैनिकी सहज हुनुका साथै आँखा स्वास्थ्यको विषयमा जनचेतना वृद्धिमा सहयोग पुगेको उहाँले बताउनुभयो ।
जिल्लामै मोतियाबिन्दुको शल्यक्रिया हुँदा पोखरालगायत सहरमा पुग्दा हुने खर्च र समयको बचत भएको छ । गुमेको आँखाको ज्योति फर्किदा सर्वसाधारणहरुले खुसी व्यक्त गरेका छन् ।
