बेनी, । म्याग्दीको सदरमुकाम बेनी बजारमा चक्रपथ स्तरोन्नति योजना सुरु भएको छ ।
बेनी नगरपालिका–८ कालीपुल देखि वडा नम्बर ७ मा रहेको दरवाङ बसपार्क जोड्ने कालीगण्डकी र म्याग्दी नदी किनारको सडक स्तरोन्नति गर्न थालिएको हो । सघन सहरी तथा भवन निर्माण आयोजना कार्यालय बागलुङसँग रु. तीन करोड १९ लाखमा ठेक्का सम्झौता गरेको विकेश–दुप्चेश्वर–सुभम जेभीले सोमबारदेखि निर्माणको काम शुरु गरेको छ ।
योजना मार्फत नौ सय मिटर सडकको कुनातर्फ टेवा पर्खाल, नाली, डिलमा रेलिङ निर्माण गरि पाँच देखि छ मिटर चौडाईका दरले ढलान गरिने आयोजना कार्यालयका इञ्जिनियर बिरबल सुनारले जानकारी दिनुभयो । बेनी बजारलाई कालीगण्डकी र म्याग्दी नदीको कटान नियन्त्रणका लागि निर्माण भएको पक्कि पर्खाल पछाडीको भागमा माटो फिलिङ गरेर बनाइएको सडकलाई स्तरोन्नति गर्न लागिएको हो ।
नेपाल सरकारले अगाडी बढाएको १० वटा नमूना नगरपालिका कार्यक्रम अन्तर्गत बेनी नगरपालिकाले बेनी चक्रपथ स्तरोन्नति योजना प्रस्ताव गरे अनुसार बजेट विनियोजन भएर योजना अघि बढेको नगरप्रमुख सुरत केसीले बताउनुभयो ।
‘‘रिङरोड स्तरोन्नति भएपछि ठूला सवारीसाधनलाई रिङरोडबाट आवतजावत गर्न सहज हु्नेछ,” उहाँले भन्नुभयो “हाल चक्रपथबाट उडेको धुलो बजारमा आएर प्रदुषण हुने समस्या पनि स्तरोन्नति भएपछि समाधान हुन्छ ।”
बेनी बजार भित्रको सडकमा सवारी चाप घटाउनका लागि चक्रपथबाट मालबाहक र बजार भित्र रोक्नु नपर्ने सवारी साधनहरुलाई सञ्चालनको व्यवस्था मिलाइएको छ । चक्रपथ स्तरोन्नति निर्माण सम्पन्न भएपछि सडक छेउछाउमा फूलहरु रोप्ने र विद्युतीकरण गरेर सौन्दर्यकरण गर्ने योजना रहेको बेनी नगरपालिका–८ का वडा अध्यक्ष उत्तमकुमार कर्माचार्यले बताउनुभयो ।
तीन वर्षे योजना अन्तर्गत आर्थिक वर्ष २०८२÷०८३ का लागि दरवाङ बसपार्क ढलान र २०८३÷०८४ मा उक्त बसपार्कमा टर्मीनल भवन निर्माण गर्न सहरी विकास मन्त्रालयलाई प्रस्ताव गरिएको छ । पर्याप्त मजदुर र उपकरण परिचालन गरेर निर्धारित समयभित्रनै योजना सम्पन्न गरिने निर्माण कम्पनीका प्रनितिधी सुवासचन्द्र कार्कीले बताउनुभयो ।
