बेनी ः २२ औ जिल्ला स्तरीय अन्तर मा.वि. जेसिजकप फुटबल प्रतियोगिताको उपाधी बेनीको माउन्ट एभरेष्ट आवासीय माविले जितेको छ ।
म्याग्दी जेसिजको आयोजनामा पाँच दिनसम्म सञ्चालन भएको प्रतियोगिताको शनिबार भएको फाइनलमा बेनी सामुदायिक माविलाई चारका विरुद्ध पाँच गोल गर्दै माउन्टले उपाधी जितेको हो ।
निर्धारित ९० मिनेटको समयमा दुवै पक्षबाट एक÷एक बराबरी गोल भएपछि खेलमा पेनाल्टी सुटआउट भएको थियो । बिजेता र उपबिजेताले ट्रफी, मेडल, प्रमाणत्र सहित नगद रु. ५२ हजार दुई सय ५२ र ३२ हजार दुई सय ३२ नगद पुरस्कार वितरण गरिएको थियो ।
न्यु वेष्ट पोइन्ट आवासीय माविलाई पेनाल्टी सुटआउटमा पाँचका विरुद्ध छ गोल गर्दै बेनी सामुदायिक र जनप्रिय मावि दरवाङलाई पराजित गर्दै माउन्ट एभरेष्ट फाइनलमा पुगेका थिए ।
गण्डकी प्रदेशसभा सदस्य हरिबहादुर भण्डारी, जिल्ला समन्वय समितिका प्रमुख राजकुमार थापा, जिल्ला खेलकुद विकास समितिका अध्यक्ष दिनेश केसी, म्याग्दी जेसिजका शाखा अध्यक्ष दिनेश बानिया लगायतले पुरस्कार वितरण गर्नुभएको थियो ।
विद्यालय तहका विद्यार्थीहरुबीच लोकप्रिय मानिएको जेसिजकपको यस वर्षको प्रतियोगितामा २० वटा विद्यालयले सहभागिता जनाएका थिए । प्रतियोगिताको प्रथम पुरस्कारको प्रायोजन एभरेष्ट ग्लोबल एजुकेसन÷भिसा सेन्टर रहेको छ ।
कोचमा माउन्टका टिपेन पुन, राइजिङ प्लेयर एन्जल थकाली, उत्कष्ट मिडपिल्डरमा वेष्ट पोइन्टको पवन खत्री, स्ट्राइकरमा मनोज मल्ल, उत्कृष्ट खेलाडीमा बेनी सामुदायिकका दिपेश गर्बुजा र गोलरक्षकमा सन्दीप क्षेत्री उत्कृष्टको उपाधी प्राप्त गर्नुभयो ।
उत्कृष्ट कोच टिपेन पुनले चौधौ र पन्ध्रौ जेसिजकपमा खेलाडीको रुपमा सहभागी भएर माउन्टलाई उपाधी दिलाएका थिए । पुन रघुगंगा गाउँपालिका ६ कोटगाउँका हुन् । खेलाडी र कोचको रुपमा आफ्नो टिमलाई जिताउने संयोजक टिपेनलाई मिलेको छ ।
अनुशाषित टिमको उपाधी पाएको न्यु वेष्ट पोइन्टका सुनिल थापाले प्रतियोगिता अवधिभर ११ गोल गर्नुभयो । मङसिर १७ गते बेनी नगरपालिकाका प्रमुख सुरत केसीले उद्घाटन गर्नुभएको प्रतियोगिताको खेल १८ गतेदेखि शुरु भएको थियो ।
