बेनी ः म्याग्दीको बेनीमा सञ्चालन भएको हाउस वायरिङ सम्बन्धी तालिम समापन भएको छ ।
नेपाल विद्युत प्राधिकरणद्धारा म्याग्दीमा निर्माणाधिन १३२ केभी क्षमताको डाडाखेत–राहुघाट प्रशारण लाइन आयोजना प्रभावितहरुलाई सिपमुलक तालिम प्रदान गरिएको हो । प्राधिकरणको वातावरण विभागको आयोजनामा बेनीमा ६५ दिन सञ्चालन भएको तालिम बुधबार समापन भएको हो ।
सम्बन्धीत वडा कार्यालयको सिफारिसमा १५ जनालाई हाउस वायरिङ सम्बन्धी तालिम दिइएको आयोजनाका प्रशासकीय अधिकृत मातृका तिमिल्सीनाले बताउनुभयो । उनिहरुलाई व्यवसायिक सिप तथा तालिम केन्द्रबाट मान्यता प्राप्त पहिलो तहको प्रमाणपत्र प्रदान गरिएको छ । मंगला गाउँपालिका २ का वडा अध्यक्ष धनबहादुर खाती क्षेत्री, प्रशासकीय अधिकृत तिमिल्सीना लगायतले प्रमाणपत्र वितरण गर्नुभएको थियो ।
म्याग्दी जिल्लामा घर तथा भवन निर्माणका लागि स्थानीय रुपमै दक्ष जनशक्ति उत्पादन गर्ने उद्देश्यले हाउस वायरिङ सम्बन्धी तालिम प्रदान गरिएको विद्युुत प्राधिकरणको वातावरण विभागका वातावरणविद् नवराज पोखरेलले बताउनुभयो ।
रघुगंगा गाउँपालिकाको वडा नम्बर ३, बेनी नगरपालिकाको ९, १०, मंगला गाउँपालिकाको वडा नम्बर १, मालिकाको वडा नम्बर ६ र ७ मा प्रशारण लाइनको टावर निर्माण स्थल हुन् । १३२ केभी क्षमताको डबल सर्किट प्रशारण लाइनको ८२ वटा टावर मध्य हालसम्म ३० वटा निर्माण सकिएको र ४८ वटा निर्माणाधिन रहेका आयोजना प्रमुख रोशन अग्रवालले बताउनुभयो ।
मालिका गाउँपालिका–७ डाडाखेत देखि रघुगंगा गाउँपालिका–३ राहुघाटको अम्वाङ जोड्ने २५ किलोमिटर १३२ केभी क्षमताको प्रशारण लाइन र दुवै ठाँउमा सवस्टेशन निर्माणका लागि चार वर्षअघि निर्माण थालिएको आयोजनाको ५० प्रतिशत भन्दा बढी भौतिक प्रगति भएको छ ।
म्याग्दी र राहुघाट नदीमा निर्माणाधिन तथा निर्माणको क्रममा रहेका आयोजनाबाट उत्पादन हुने विद्युतलाई राष्ट्रिय प्रणालीमा आवद्ध गराउन एशियाली विकास बैंकको ऋणमा सवस्टेशन र प्रशारण लाइन निर्माण गर्न लागिएको हो ।
