बेनी,। म्याग्दीको रघुगंगा गाउँपालिका–८ दुवाडी ढाँडमा आयोजित मेलामा कुटपिट हुँदा एक जना गम्भिर घाइते भएका छन् ।
कालीबराह युथ क्लवले जनैपूर्णिमा पर्वको अवसर पारेर आयोजना गरेको मेलाको खेलकुद प्रतियोगितामा सहभागि भएका रघुगंगा –८ को साहरा स्पोर्ट्स क्लवका खेलाडी २६ वर्षीय दुर्गाबहादुर छन्त्यालमाथि कुटपिट भएको हो ।
खाना खान होटलमा गएका दुर्गाबहादुरलाई प्रकाश छन्त्याल, रुपेश छन्त्याल, निर छन्त्याल, केशव छन्त्याल सहितको ६÷७ जनाको समूहले धारिलो हतियार प्रहार र कुटपिट गरेर गम्भिर घाइते बनाएका दुर्गाबहादुरका दाजु युवराज छन्त्यालले बताउनुभयो ।
उहाँका अनुसार टाउको र आँखामा चोट लागेर घाइते भएका दुर्गाबहादुरलाई बेनी अस्पतालले सिफर गरेपछि उपचारका लागि बिहिबार पोखराको गण्डकी अस्पतालको आइसीयुमा राखिएको छ ।
पिडितको तर्फबाट युवराजले चार जना विरुद्ध ज्यान मार्ने उद्योग सम्बन्धी मुद्दामा जिल्ला प्रहरी कार्यालयमा लिखित किटानी जाहेरी सहितको निवेदन बुझाउनु भएको छ । जिल्ला प्रहरी कार्यालयका प्रहरी निरीक्षक राजन रायमाझीले दुर्गाबहादुरको तर्फबाट घटनाको विषयमा जानकारी आएको र पिडक पक्षलाई छलफलमा बोलाएको बताउनुभयो ।
कुटपिटको आरोप लागेका प्रकाश छन्त्यालले दुर्गाबहादुरले आफूमाथि आक्रमण गरेकाले प्रतिकार गर्दा असहज वातावरण सिर्जना भएको प्रतिक्रिया दिनुभयो ।
