बेनी, जिल्ला अदालत म्याग्दीमा स्वचालित पेशी (अटोमेसन) प्रणाली लागू भएको छ ।
सर्वोच्च अदालतको रणनीतिक योजना अनुसार म्याग्दी अदालतले सफ्टवेयरको माध्यमबाट मुद्दाको पेशी तोक्ने अभ्यास थालेको हो । म्याग्दी जिल्ला अदालतका न्यायाधिश प्रकाशप्रसाद पण्डितले अंग पुगेका मुद्दाहरुको स्वचालीत रुपमा पेशीको मिति निर्धारण हुन थालेपछि न्याय सम्पादनमा सहजता आएको बताउनुभयो ।
“यस अघि अदालतमा मुद्दा दर्ता भएपछि कर्मचारीले पक्ष र विपक्षको सहमतिमा तारेख र पेशी तोक्ने अभ्यास थियो,” उहाँले भन्नुभयो, ‘‘अटोमेसन प्रणाली लागू भएपछि मुद्दाको प्रकृति अनुसार सफ्टवेयरबाट पेशीको मिती तय हुन्छ ।”
अटोमेसन प्रणालीबाट मुद्दाको पेशी तोक्दा पक्ष र विपक्षका बिच हुने बादबिवादलाई अन्त्य गर्नुका साथै मुद्दाको प्रकृति र विषय अनुसार छुट्टाएर हेर्ने हुँदा ब्यवस्थाकीय हिसाबले पनि सहज भएको न्यायाधिश पण्डितले बताउनुभयो ।
न्यायपालिकाको रणनीतिक योजनाले सरल, सामान्य र विशेष गरेर मुद्दाको वर्गीकरण गरे अनुसार सफ्टवेयरमा प्रविष्ट गराउने गरिएको छ । पहुँचको भरमा आफु अनुकुल पेशीको समय तोक्ने समस्याको अत्त्य भइ सबै सेवाग्राहीलाई समान ब्यवहार हुन थालेको छ ।
बालबालिका सँग सम्बन्धित र १८ महिना काटेका मुद्दाको हकमा प्राथमिकता दिएर काम गर्नुपर्ने भएकाले सफ्टवेयरले पनि त्यही अनुसार पेशी चढाउने गरेको छ । प्रत्येक आइतबार बालबालिकासँग सम्बन्धित, ६ महिना भित्र टुङ्गाउने मुद्दालाई सोमबार र मङ्गलबार, एक वर्ष भित्र हेर्नुपर्ने मुद्दालाई बुधबार, एक वर्षदेखि डेढ वर्ष भित्रका मुद्दाहरू बिहीबार र शुक्रबार अदालतबाट फैसला भएका मुद्दाहरूको कार्यान्वयनका लागि तयारीका साथै आएका निवेदनहरू हेर्ने गरिएको श्रेस्तेदार भोलाराज रेग्मीले जानकारी दिनुभयो ।
यसैगरी, अदालतको तथ्याङ्क अनुसार गत आर्थिक वर्ष पाँच सय ९३ मुद्दा रहेकोमा चार सय ४८ वटा फर्छ्यौट भएर एक सय १० मुद्दा चालु वर्षमा जिम्मेवारी सरेका छन् । गत वर्ष पनि अघिल्लो वर्षका एक सय सय ३२ मुद्दा सरेर आएकोमा चार सय ६१ मुद्दा थपिएका थिए । तीन सय १७ सम्बन्ध विच्छेदका मुद्दा रहेकोमा गत वर्ष दुई सय ६७ थान मुद्दा फर्छ्यौट भएका छन् । अदालतमा धेरै जसो सम्बन्ध विच्छेदका मुद्दाहरू आउने श्रेस्तेदार रेग्मीले बताउनुभयो ।
