बेनी, सडकको बिचमा पहिरो सहित खसेको ठुलो ढुङ्गाले म्याग्दीको उत्तरी क्षेत्र हुदै हिमाली जिल्ला मुस्ताङलाई राष्ट्रिय राजमार्गसँग जोड्ने बेनी–जोमसोम सडक आज बिहानै देखि अवरुद्ध बनेको छ ।
रघुगंगा गाउँपालिका–२ सिरुबारीमा शुक्रबार बिहान खसेको पहिरो र ठूलो ढुङ्गा सडकको बिच भागमा थुप्रिएको हो । बेनी–जोमसोम–कोरला सडक आयोजनाका सवईञ्जिनियर सोहनजंग कार्कीले सडकको बिच भागमा रहेको ठूलो ढुङ्गा फुटाउन ब्रेकर सहितको डोजर परिचालन गर्न लागिएको बताए ।
‘लोडरले पहिरो र ब्रेकरले ढुंगा फुटाउने तयारी गरेका छौ,’ उनले भने ‘सडक माथिको पहिरोमा रहेको ढुंगा रातको समयमा खसेर क्षतिको जोखिम टरेपनि फुटाउन समय लाग्ने भएकाले शुक्रबार तत्काल यातायात सञ्चालन गर्न चुनौति छ ।’
स्तरोन्नतिको क्रममा रहेको बेनी–जोमसोम–कोरला सडक आयोजनाका निर्माण ब्यवसायी, सडक विभागका उपकरण, प्राबिधिक र मजदुरहरु पहिरो र ढुङ्गा पन्छाउन परिचालन भएका छन् । करिब ५०० मिटर माथिदेखिको जमिन बगेर सिर्जना भएको सिरुबारीको पहिरो स्तरोन्नतिको क्रममा रहेको बेनी–जोमसोम सडकको नयाँ चुनौति बनेको छ ।
७४ किलोमिटर दुरिको बेनी–जोमसोम सडकमा सिधा यातायात सेवा अवरुद्ध हुँदा म्याग्दीको रघुगंगा, अन्नपूर्ण गाउँपालिका र मुस्ताङका बासिन्दाका साथै तिर्थयात्री र पर्यटकहरुलाई समस्या भएको छ ।
