जोमसोम, मुस्ताङका पर्यटकीय स्थल घुम्नका लागि एक वर्षको अवधिमा ४ लाख २७ हजार जना पर्यटक आएका छन् ।
मुस्ताङ भित्रने एक मात्र बेनी–जोमसोम सडक प्रयोग गरि आर्थिक वर्ष २०८०÷०८१ मा अघिल्लो वर्षको तुलनामा ४७ हजार ५०४ जना बढी संख्यामा पर्यटक आएका हुन् । घासा प्रहरी चौकीले स्थल मार्ग भएर मुस्ताङ भित्रने सवारी साधन र पर्यटक तथ्याङ्क तथा विवरण राख्ने गरेको छ ।
जिल्ला प्रहरी कार्यालय मुस्ताङका प्रहरी नायव उपरीक्षक भोजराज पाण्डेले २०८० साउन देखि २०८१ असार महिना सम्म ७४ हजार ३७४ वटा सवारी साधन मार्फत ४ लाख २७ हजार २७१ जना पर्यटक भित्रिएका जानकारी दिनुभयो ।
३ लाख १८ हजार ८१४ जना आन्तरिक, ९९ हजार २७६ जना सार्क राष्ट्रका र ९ हजार १७१ जना तेस्रो मुलुकका पर्यटक मुस्ताङ भ्रमणमा आएका उहाँले बताउनुभयो । आर्थिक वर्ष २०७९÷८० मा ६२ हजार ३४० वटा सवारी साधन मार्फत ३ लाख ७९ हजार ७६७ जना पर्यटक मुस्ताङ आएका थिए । जस मध्य आन्तरिक पर्यटक ३ लाख ३ हजार ८०० जना र विदेशी ७५ हजार ९६७ जना रहेका थिए ।
सडक यातायातको सुविधा, अन्नपूर्ण चक्रीय पदमार्गलाई विश्वप्रसिद्ध सञ्चार माध्यमहरुले संसारका उत्कृष्ट दश गन्तब्यमा समेट्नु, प्रचारप्रसार, डिजिटल मार्केटिङ, सुविधायुक्त होटल खुलेका कारण पर्यटक आगमन बढेको मुक्तिनाथ मन्दिरका पुजारी कृष्णप्रसाद सुवेदीले बताउनुभयो ।
मुस्ताङ भित्र्ने विदेशी पर्यटकको ठूलो संख्या भारतीयको छ । उजाड पहाड, हिमाली हावापानी, संस्कृति र जिवनशैली, ताल, गुम्बा, मुक्तिनाथ मन्दिर, गुफाहरु मुस्ताङका आकर्षण हुन् । मुक्तिनाथ, जोमसोम, कागबेनी, लोमान्थाङ, मार्फा, ठिनी, धुम्बा ताल लगायत मुस्ताङका धार्मिक र पर्यटकीय स्थल रहेका छन् ।
म्याग्दी हुँदै सडक मार्ग, मुस्ताङको थोराङ्ला भञ्ज्याङ हुदै पैदल मार्ग र पोखराबाट हवाई मार्ग भएर पर्यटक मुस्ताङ पुग्छन् । सार्क मुलुक बाहिरका पर्यटकको संख्या भने घट्दै जानु चुनौति रहेको वारागुङ मुक्तिक्षेत्र गाउँपालिकाका अध्यक्ष रिनजिन गुरुङले बताउनुभयो ।
स्तरोन्नतिको क्रममा रहेको बेनी–जोमसोम सडक कालोपत्र योजना निर्माण सम्पन्न हुने हो भने पर्यटक आगमन अझै बढ्ने उहाँले बताउनुभयो ।
