पोखरा, । म्याग्दीबाट निर्वाचित गण्डकी प्रदेश सभा सदस्य रेशमबहादुर जुग्जालीले गण्डकी प्रदेशमा मध्यावधीको खतरा रहेको भन्दै चिन्ता व्यक्त गर्नुभएको छ ।
गण्डकी प्रदेश सभाको विहीबार बसेको छैटौं अधिवेशनको छैटौं बैठकमा पेस भएको आगामी आर्थिक वर्ष २०८१्८२ को बजेटको सिद्धान्त र प्राथमिकतामाथिको छलफलमा भाग लिदै नेकपा माओवादी केन्द्रका सांसद जुग्जालीले आग्रह गर्नुभयो ,‘सबै नेता साथीहरु र माननीय ज्यूहरुलाई मेरो आग्रह के छ भने, अब हामी कतै मध्यावधी निर्वाचनतर्फ डोहोरिदै त छैनौं भन्ने सिनहरुपनि देखिइरहेको छ ।’ उहाँले यसबारे गम्भीरतापूर्वक छलफल गर्नुपर्ने भन्दै दलका नेताहरुलाई यसको अगुवाई गर्न आग्रह गर्नुभयो ।
प्रदेश सांसद जुग्जालीले कहिले को सत्तापक्ष त कहिले को प्रतिपक्ष हुने भएपनि सबैको लक्ष्य गण्डकी प्रदेशको विकास र समृद्धि भएको बताउनुभयो । माननीय ज्यूहरुको कयौं बाध्यताहरुका कारण मनले नमानी नमानी कहिले विरोध त कहिले समर्थन गर्नुपरेको होला, उहाँले भन्नुभयो ,‘तर हामी गण्डकी प्रदेशलाई समृद्ध बनाउनेतर्फ लागौं ।’
सांसद जुग्जालीले व्यवस्थाका कारण राजनीतिक अस्थिरता आएको भन्ने अन्य माननीयहरुले दिएको अभिव्यक्तिप्रति आपत्ति जनाउनुभयो । राजनीतिक अस्थिरता व्यवस्थाकै समस्या भन्नेजस्ता अभिव्यक्ति आइरहेका छन्, उहाँले थप्नुभयो ,‘तर त्यस्तो होईन । व्यवस्था आफैमा सुन्दर छ । यसलाई कसरी व्यवहारिक कार्यान्वयनको कुरा हो । कहिले माननीय सुरेन्द्रराज पाण्डे मुख्यमन्त्री हुनुभयो होला तर कहिले माननीय खगराज अधिकारी मुख्यमन्त्री हुनुभयो होला । तर जो भएपनि जनताको छोरा भएका छन् । यो नै यसको सुन्दरता हो ।’
