धौलागिरि खबर

रत्नेचौरमा सडक कालोपत्रे सुरु (भिडियो रिपोर्ट सहित)

रत्नेचौर । ट्याक (मार्ग) खोलिएको २० वर्षपछि म्याग्दीको बेनी नगरपालिकाको तीन वटा वडालाई समेटेको रत्नेचौर–भकुण्डे–भकिम्ली सडक कालोपत्रे सुरु भएको छ ।

रत्नेचौर देखि अर्जम, भकुण्डे हुदै भकिम्ली जोड्ने यो सडकबाट बेनी नगरपालिकाको १, २ र ३ नम्बर वडाका दुई हजार पाँच सय घरधुरी लाभान्वित हुने जनाएको छ । बेनी नगरपालिकाले अघि सारेको चक्रपथ सडकको अवधारणा अनुसार जिरो पोइन्ट मानिएको रत्नेचौरदेखि सडक डिभिजन कार्यालय बागलुङले कालोपत्रे गर्न लागेको हो ।

जिरो किलोमिटर देखि उपल्लाचौरको राम्चेको घुम्तिसम्म एक हजार ३०० मिटर सडकलाई ८.२० मिटर फराकिलो, नाली बनाउने र ग्राभेल भइसकेको रत्नेचौरका वडा अध्यक्ष टेकबहादुर रावलले जानकारी दिनुभयो । “ठेकेदार कम्पनीले कालोपत्रेका लागि सामान जुटाउने र सरसफाई गरेको छ,” उहाँले भन्नुभयो “अनुकुल तापक्रममा तिहार लगत्तै कालोपत्रे गरिसक्ने तयारी छ ।”

Rara Auto Mobiels

राम्चेको घुम्तिको उकालोमा करिब १०० मिटर सडक ढलान भइसकेको छ । वि.स. २०५७÷५८ मा तत्कालीन जिल्ला बिकास समितिले रत्नेचौरदेखि यो सडकको मार्ग निर्माण सुरु गरेको थियो । रत्नेचौर देखि भकुण्डे हुदै भकिम्लीको डोले जोड्ने १८ किलोमिटर दुरिको यो सडकको बिस्तृत परियोजना प्रतिवेदन (डिपिआर) तयार पारेर गत आर्थिक वर्षदेखि बहुबर्षे आयोजना सञ्चालन भएको प्रतिनिधिसभा सदस्य भुपेन्द्रबहादुर थापाले बताउनुभयो ।

“कुल रु. ३५ करोड लागत अनुमान गरिएको छ,” उहाले भन्नुभयो “गत आबमा बिनियोजन भएको रु. चार करोड बजेटबाट सडक डिभिजनले दुई वटा प्याकेजमा ठेक्का लगाएको थियो । यस वर्ष पनि योजनाले निरन्तरता पाएको छ ।”

कालोपत्रे र ढलानका लागि सर्वसिद्धि कन्ट्रक्सन प्रा.लीले रु. एक करोड ७३ लाख मा ठेक्का लिएको थियो । दोस्रो प्याकेजमा उपल्लाचौर देखि अर्जम हुदै भकुण्डे खण्डमा सडक बिस्तार, पर्खाल र नाली बनाउन रु. एक करोड ६९ लाखमा अर्को ठेक्का लगाएको थियो । सडक बिस्तार र स्तरोन्नतिसँगै कालोपत्रे हुन लागेपछि आवत जावतमा सहज हुने र ढुवानी भाडा घट्ने स्थानीय मोतिलाल किसानले बताउनुभयो ।

“साघुरो, ग्रेड तथा घुम्ति नमिलेको कच्चि सडकमा जोखिमपूर्ण यात्रा गर्दै आएका स्थानीयबासी कालोपत्रे हुन थालेपछि उत्साहीत र खुसी भएका छौ,” उहाँले भन्नुभयो “बर्खामा हिलो, पहिरोले सडक अवरुद्ध हुने तथा हिउँदमा धुलाम्मे हुने समस्या हटेर सुरक्षित रुपमा यात्रा गर्न पाउने अपेक्षा छ ।”

Dhakal lab
प्रतिक्रिया दिनुहोस
Loading...