नारच्याङ । म्याग्दीको अन्नपूर्ण गाउँपालिका–४ नारच्याङको छेम्दी टोलमा ‘एक घर, एक धारा’ सहितको खानेपानी आयोजना निर्माण भएको छ ।
गोर्खा वेयलफेयर ट्रष्टको आर्थिक र प्राविधिक सहयोगमा स्थानीय उपभोक्ताहरुले श्रमदान गरेर खानेपानी तथा सरसफाई आयोजना निर्माण गरेका हुन् । मुलपानी र लट्टेखोरीयाको मुहानबाट पानी ल्याएर घरघरमा धारा बनाएर वितरण गरिएको कार्यवाहक वडा अध्यक्ष श्याम पुर्जाले जानकारी दिनुभयो ।
उहाँका अनुसार आयोजनाबाट छेम्दी टोलका ७२ घरधुरी लाभान्वित भएका छन् । धारामा मिटर समेत जडान गरिएको छ । यसअघि छेम्दीबासीले सार्वजनिक धारा र मुहानबाट निजी लगानीमा पाईप जडान गरेर खानेपानी उपभोग गरेका छन् ।
घरमै भएको निजी धारामा नियमित खानेपानी वितरण भएपछि समयको बचत र सहज भएको स्थानीयबासी देउमन पुर्जाले बताउनुभयो । खानेपानी सुविधाले स्थानीयबासीको दैनिकी परिवर्तन भएको छ । गत मंसिर महिनादेखि शुरु भएको आयोजना यसै हप्ता सम्पन्न भएको हो ।
कुल रु. ६४ लाख ६६ हजार ६८ लागत अनुमान गरिएको आयोजना निर्माणमा उपभोक्ताहरुले रु. २२ लाख ३५ हजार ७२८ बराबरको श्रमदान गरेका गोर्खा वेयलफेयर ट्रष्टका प्राविधिक देवी थापा मगरले बताउनुभयो ।
पाइप, सिमेन्ट, रड, फिटिङ लगायत निर्माण सामग्री उपलब्ध गराएको ट्रष्टले आयोजना निर्माण स्थलमा एक जना प्राविधिक नियमित रुपमा परिचालन गरेको थियो । गोर्खा वेयलफेयर ट्रस्टको सहयोगमा अन्नपूर्ण गाउँपालिका–६ मा खिवाङ र वडा नम्बर –३ को काभ्रेमा पनि खानेपानी तथा सरसफाई आयोजना निर्माणको अन्तिम चरणमा छ ।
खिवाङमा १४२ र काभ्रेमा ७५ घरधुरी लाभान्वित हुने प्राविधिक गुरुङले बताउनुभयो । गोर्खा वेयलफेयर ट्रष्टको सहयोगमा गत वर्ष अन्नपूूर्ण गाउँपालिका –४ को पटारमा निर्माण भएको खानेपानी आयोजनाबाट २९ घरधुरी, वडा नम्बर –३ को दाना बजारमा ५१ र दुवारीमा –२६ घरमा निजी धारा जडान गरेर खानेपानी वितरण गरिएको थियो ।
गोर्खा वेल्फेयर ट्रष्टले अन्नपूर्ण गाउँपालिकाको दश वर्षे खानेपानी सरसफाई तथा स्वच्छता योजना पनि तयार पारेको गाउँपालिकाका अध्यक्ष भारतकुमार पुनले जानकारी दिनुभयो । खानेपानी विभागको मापदण्ड अनुसार अन्नपूर्णका सतप्रतिशत नागरिकलाई स्वच्छ खानेपानी उपलब्ध गराउन २२ वटा थप आयोजना निर्माण गर्नुपर्ने योजनामा उल्लेख छ ।
