पोखरा, नष्ल सुधारका लागि मुस्ताङका कृषकहरुलाई याक वितरण गरिएको छ ।
गण्डकी प्रदेशको कृषि तथा भूमि व्यवस्था मन्त्रालय अन्र्तगतको पशु तथा मत्स्य विकास निर्देशनालयले १० वटा याक वितरण गरेको हो । सोलुखुम्बुको स्याङबोचेमा रहेको याक आनुवांशिक स्रोत केन्द्रबाट खरिद गरेर ल्याएका याक गण्डकी प्रदेशका मुख्य मन्त्री सुरेन्द्रराज पाण्डे र कृषि तथा भूमि व्यवस्था मन्त्री महेन्द्रध्वज जिसीले मंगलबार साँझ पोखरामा भएको कार्यक्रममा मुस्ताङका प्रदेश सभा सदस्य बिकल शेरचन र नाम्दु गुरुङलाई हस्तान्तरण गर्नुभएको थियो ।
कृषि तथा भूमि व्यवस्था मन्त्री जिसीका निजी सचिव डिल्लीराम रेग्मीले सोलुखुम्बुबाट ल्याइएका १९ वटा मध्य ९ वटा मनाङ जिल्लाका कृषक, समूह र समितिलाई दिइने जानकारी दिनुभयो ।
“एकै ठाउँको याकबाट धेरै वर्ष प्रजनन् क्रिया हुँदा हाडनाताको समस्या हुने भएकाले सोलुखुम्बुबाट ल्याएर चौरीपालक कृषक, समूह र सहकारीलाई वितरण गरिएको हो,” उहाँले भन्नुभयो “नष्ल सुधार भई चौरीपालक कृषकहरुलाई लाभ पुग्ने अपेक्षा गरेका छौ ।”
मुख्यमन्त्री पाण्डेले याक हस्तान्तरण गर्दै उन्नत जातको याकबाट नश्ल सुधारमा मद्दत पुग्ने र हिमाली क्षेत्रका कृषकलाई फाइदा हुने बताउनुभयो । गण्डकी प्रदेशको मुस्ताङ र मनाङ जिल्लामा व्यवसायिक चौरीपालन हुने गरेको छ । म्याग्दी र कास्कीको लेकाली क्षेत्रमा पनि चौरीपालन भएको छ ।
यातायातको सुविधा नभएको ठाउँमा याकलाई भारी बोकाउन र मासुका लागि प्रयोग गर्छन् । चौरीको दूध, घ्यू र छुर्पी बिक्री हुन्छ । याकचौरीको आलो रगत निकालेर समेत बिक्री गरिन्छ । मुस्ताङ र म्याग्दीमा साउन र चैत महिनामा चौरीको रगत पिउने मेला लाग्छ । धार्मिक कार्यमा प्रयोग हुने याकचौरीको पुच्छर महँगो मूल्यमा बिक्री हुन्छ ।
मुस्ताङमा झन्डै ४ हजार याकचौरी रहेको हिमालयन चौरी पालन तथा संरक्षण समितिले जनाएको छ । थासाङ गाउँपालिकामा २२ घरधुरीले व्यवसायिक रुपमा एक हजार पाँच सयभन्दा बढी याकचौरी पालेका छन् ।
घरपझोङ गाउँपालिकाको मार्फा, स्याङ र जोमसोम गरी ८ घरधुरीले करिब ५ सय याकचौरी पालेका छन् । बर्खामा हिमालको फेदी र लेकाली क्षेत्रमा लगिएका याकचौरीको गोठ चिसो याममा बेशी झारिएको छ ।
