बेनी, म्याग्दीको अन्नपूर्ण गाउँपालिका–२ मा मोटरसाइकल सहित कालीगण्डकी नदीमा खसेर वेपत्ता भएका युवाको शव तीन दिनपछि भेटिएको छ ।
अन्नपूर्ण गाउँपालिका–४ नारच्याङ घर भई सोही पालिकाको वडा नं.–२ भुरुङ्ग तातोपानीमा बस्ने ३० वर्षीय सुजन घर्तिको बिहिबार नैनिबगर स्थित कालिगण्डकी नदीको खोचमा शव भेटिएको जिल्ला प्रहरी कार्यालय म्याग्दीले जनाएको छ ।
शशसत्र प्रहरी बल आश्रित गुल्म गलेश्वरबाट खटिएको गोटाखोर र नेपाल प्रहरीको संयुक्त टोलीले खोजी गर्ने क्रममा घर्तिको शव फेला पारेको प्रहरी नायव उपरीक्षक मदन कुँवरले बताउनुभयो ।
पुष २ गते राती नौ बजे ग २२ प ११३० नम्बरको मोटरसाइकलमा चढेर भुरुङ्ग तातोपानीबाट पोखरेबगर तर्फ हिडेका सुजन सम्पर्क बिहिन भएपछि आफन्त, छिमेकी र प्रहरीको टोलीले खोजी गरेको थियो ।
सडक मुनी कालिगण्डकी किनारमा सुजनले लगाएको हेल्मेट भेटिएपछि नदी किनारमा खोजी केन्द्रित गरिएको थियो । सुजन चढेको मोटरसाइकल भने भेटिएको छ । बेनी जोमसोम–सडकअन्र्तगत गत कात्तिकमा म्याग्दीको अन्नपूर्ण गाउँपालिका–३ काभ्रेभिरमा मोटरसाइकल सहित खसेका एक जना पर्यटकको ज्यान गएको थियो ।
यसैगरी म्याग्दीको धवलागिरी गाउँपालिका–७ हिलापोखरीबाट पुष ३ गते रातीदेखि हराएकी ७६ वर्षीया मनकुमारी पुनको बिहिबार शव भेटिएको छ । सोही वडाको खोर्वाङ स्थित म्याग्दी नदीको खोचमा पुनको शव भेटिएको प्रहरी निरीक्षक अशोक कुमार झाले बताउनुभयो ।
मृतक दुवै जनाको शव परिक्षणका लागि बेनी अस्पतालमा राखिएको छ । घटनाको अनुसन्धान जारी रहेको प्रहरी निरीक्षक झाले बताउनुभयो ।
