बेनी, । मंगला गाउँपालिका–२,बाबियाचौरको लाम्पाटामा अवस्थित मंगला शिक्षा क्याम्पसमा प्रशासनीक भवनको शिलन्यास गरिएको छ ।
सोमबार एक कार्यक्रमका बिच गाउँपालिका अध्यक्ष सतप्रसाद रोकाले भवनको शिलन्यास गर्नुभएको हो । कुल ५५ लाख ९० हजार २२२ लागतमा मंगला कस्ट्रक्सनले निर्माण गर्न लागेको प्रशासनीक भवनमा सभाहल, प्रतिक्षा कक्ष सहित ३ कोठे हुने क्याम्पस प्रमुख पितमबहादुर खत्रीले जानकारी दिनुभयो ।
भवन आगामी चैत्र महिनाभित्र निर्माण पुरा गर्ने लक्ष्य राखिएको छ । भवनको शिलन्यास गदैं क्याम्पसका संरक्षक एवम् गाउँपालिका अध्यक्ष रोकाले भौतिक पूर्वाधारसँगै शैक्षिक गतिविधिलाई समेत तिब्रता दिदैं पश्चिम म्याग्दीको शैक्षिक हब बनाउनुपर्ने बताउनुभयो । क्याम्पसको प्रशासनीक भवनको ३ तलेको डिपिआर तयार गरिएकाले भविस्यमा एउटै भवनबाट प्रशासनीक कार्यसम्पादनका लागि थप संरचना थपिने क्याम्पस सञ्चालन समितिका अध्यक्ष यामबहादुर थापाले बताउनुभयो ।
हाल शिक्षा संकायमा पठनपाठन भइरहेको क्याम्पसमा प्राविधिक र ब्यवस्थापन संकाय समेत थप गर्ने गरी संरचना थपिने अध्यक्ष थापाको भनाई छ । प्रशासनीक भवन शिलन्यास कार्यक्रममा मंगला–२ का वडा अध्यक्ष धनबहादुर खाती, प्राध्यापक संघ मंगला शिक्षा क्याम्पसका अध्यक्ष कलम भण्डारी, स्ववियू सभापति भिममायाँ रोका, सञ्चालन समितिका सदस्यहरु सहितको उपस्थिती रहेको थियो ।
म्याग्दीको सदरमुकाम बाहिरको पहिलो क्याम्पस मंगला शिक्षा क्याम्पसले गुणस्तर सुनिश्चितता तथा प्रत्यायन प्रणाली(क्यूएए) मान्यताका लागि आवश्यक प्रक्रियामा समेत अगाडी बढेको छ । क्याम्पसलाई विश्वविद्यालय अनुदान आयोगबाट भौतिक पूर्वाधार सहित तालिम, शैक्षिक अवलोकन भ्रमण, अनुसन्धानमुलक तालिम लगायतका गतिविधिमा समेत सहयोग भइरहेको छ ।
