बेनी, ः म्याग्दीको मालिका गाउँपालिका–६ को उपल्लो दुखु गाउँमा पोल गाडेको चार वर्षपछि केन्द्रिय प्रशारण लाइनको बिजुली बलेको छ ।
नेपाल बिद्युत प्राधिकरणले पर्वतको मिलनचोक देखि म्याग्दीको मालिका गाउँपालिका–६ रातोढुङ्गा जोड्ने प्रशारण लाइन, ३३÷११ केभी क्षमताको रातोढुङ्गा सबस्टेशन र दुखु लगायत आसपासका तीन वटा वडामा बिद्युतीकरण गर्न २०७४ मा काम शुरु गरेको थियो । वि.स. २०७६ मा पोल गाडिएको थियो ।
सोही योजना अनुसार उपल्लो दुखुका ४१ र खुवाङका ८ घरमा गत केन्द्रिय प्रशारण लाइनको बिजुली बलेको उपल्लो दुखुका बासिन्दा ओमकार रोकाले जानकारी दिनुभयो । “पोल गाडेको चार वर्षपछि गत शनिबारदेखि केन्द्रिय लाइनको बिजुली बाल्ने सपना पुरा भएको छ,” उहाँले भन्नुभयो “गोल गाड्न र तार तान्न बाँकी रहेकाले दुखुका अझै ५० घरमा बिजुली बल्न बाँकी छ ।”
बिजुली बलेपछि घरायसी काम गर्न, बालबालिकालाई पढ्न, उद्यम व्यवसाय सञ्चालन गर्न, इन्टरनेट, कम्प्युटर, ल्यापटप चलाउन, टिभी हेर्न, मोवाईल चार्ज गर्न, रेडियो सुन्न सहज भएको स्थानीयबासी ईश्वरी पुनले बताउनुभयो । दुखुका बासिन्दा रातको समयमा उज्यालोका लागि १४.५ किलोवाट क्षमताको दुखुखोला लघुजलविद्युत परियोजनाको विद्युत प्रयोग गर्दथे ।
नियमित र दिउँसो विद्युत आपुर्ति नहुँदाको समयका लागि विकल्पमा सौर्य उर्जा प्रयोग गर्दै आएका थिए । नियमित बिजुली आपुर्ति हुन थालेपछि जनजिवन सहज भएको पुनले बताउनुभयो । नेपाल विद्युत प्राधिकरणको बेनी वितरण केन्द्रले एशियाली विकास बैंकको परियोजना मार्फत संरचना तयार भएपछि विद्युत वितरण गरिएको जनाएको छ ।
केन्द्रका ईञ्जिनियर शिवप्रसाद शर्माले उपल्लो दुखुमा १०० केभी र खुवाङमा २५ केभीको ट्रान्सफर्मर जडान गरेर विद्युत आपुर्ति तथा वितरण हुने व्यवस्था मिलाएको बताउनुभयो । पोल गाड्ने, तार तान्ने, वायरिङ र ट्रान्सफर्मर जडान गर्ने काम सकिएपछि दुखुका बाँकी घरधुरीमा बिजुली बाल्ने योजना रहेको उहाँले बताउनुभयो ।
म्याग्दी बितरण केन्द्र अन्तरगत २२ हजार विद्युतका गा्रहाक छन् । गत आर्थिक वर्ष २०७९÷०८० मा एक हजार २३८ उपभोक्ता थपिएका थिए । म्याग्दीमा केन्द्रिय लाइनको विद्युत नपुगेका दुई हजार दुई सय घरधुरीमा विद्युतीकरण गर्ने उद्देश्यले हालै रु. बीस करोड भन्दा बढी बजेटको ठेक्का सम्झौता भएको छ ।
भौगोलिक रुपमा विकट र दुर्गम क्षेत्रमा अवस्थित धवलागिरी गाउँपालिकाको गुर्जा बाहेक सबै बस्तिमा केन्द्रिय लाइनको विद्युत विस्तार गर्ने तयारी भएको गण्डकी प्रदेशसभा सदस्य हरिबहादुर भण्डारीले जानकारी दिनुभयो ।
