बेनी, मुस्ताङलाई राष्ट्रिय राजमार्गसँग जोड्ने बेनी–जोमसोम सडक अन्तरगत म्याग्दीको अन्नपूर्ण गाउँपालिका–३ को जलथले देखि दुवारी खण्डको सडक पाँच दिनपछि सञ्चालन भएको छ ।
अन्नपूर्ण गाउँपालिकाको जलथले, गुँइठे, सुकेबगर, खामभिक्ता, लगायतका क्षेत्रमा अविरल बर्षासँगै ५० भन्दा बढी ठाउँमा खसेको पहिरोका कारण ७६ किलोमिटर दुरिको बेनी–जोमसोम सडकमा सिधा यातायात सञ्चालन हुन सकेको थिएन् । बेनी–जोमसोम–कोरला सडक आयोजनाका प्रमुख जगत प्रजापतिले पहिरो पन्छाएर बुधबार बिहान सडक खुलाइएको जानकारी दिनुभयो ।
“कालीगण्डकीको कटान, कमजोर भूगोल, भूमिगत पानीको उचित व्यवस्थापन नहुनु र शाखा सडकका कारण सिर्जना भएको पहिरोले जलथले–दुवारी खण्डको सडक क्षतविक्षत बनाएको छ,” उहाँले भन्नुभयो “चार वटा डोजर, म लगायत आयोजनाका ईञ्जिनियर र प्राविधिकहरुको टोली पाँच दिनदेखि खटेर सडक खुलाएका छौ ।”
सडक खुलेपछि जलथले र दाना क्षेत्रमा रोकिएका सवारी साधनहरु गन्तब्यतर्फ लागेका छन् । सडक अवरुद्ध भएपछि दाना देखि नारच्याङको घराप सम्म हिलाम्मे सडकमा कष्टपूर्ण पैदलयात्रा गर्न बाध्य भएका थिए ।
सडक मर्मतका क्रममा गुइठेको भिरबाट खसेको ढुङ्गाले चोट लागेर सडक विभागका डोजर अपरेटर नारायण गिरी र सवारी चालक सुभाष कुमाल घाइते हुनुभएको आयोजना प्रमुख प्रजापतिले जानकारी दिनुभयो ।
आयोजना प्रमुख प्रजापति, ईञ्जिनियर बिष्णु चापागाई, सवारी चालक अजय स्याङताङ, सुभर भाइजर इन्द्रसिंह शेरचन लगायतको टोली पहिरो पन्छाउने र सडक मर्मतमा परिचालन हुनुभएको छ ।
म्याग्दीका प्रमुख जिल्ला अधिकारी तुलसीराम पौडेलले बेनी–जोमसोम सडकको म्याग्दी खण्डमा पहिरोको जोखिम रहेकाले रातको समयमा र अत्यावश्यक काम नपरि यात्रा नगर्न सूचना प्रकाशन गरेर यात्रुहरुलाई अनुरोध गरेको बताउनुभयो ।
साउन २४ गते बेनी–जोमसोम सडक अन्तरगत म्याग्दीको रघुगंगा गाउँपालिका–२ र ३ को सिमा क्षेत्रमा पर्ने बैसरी अधेरीखोलामा पहिरो खसेर घाइते भएका गाडी चालक अन्नपूर्ण गाउँपालिका–७ महभिरका ४० वर्षीय लुप्सन शेरपुजाको मृत्यु भएको थियो ।
बैसरीमा १२ दिन अवरुद्ध भएको सडक साउन ३१ गते खुलाइएको थियो । बैसरीको पहिरोको समस्या समाधान भएपनि जलथले–दुवारी खण्डमा पहिरोले दुख दिन थालेको छ ।
