बेनी,। म्याग्दीको बेनी नगरपालिका–९ मा रहेको पवित्र धार्मिक एवम् तीर्थस्थल गलेश्वरमा साउन महिनामा रु. नौ लाख भन्दा बढी भेटि संकलन गरिएको छ ।
साउन महिनाको सोमबारका दिन गलेश्वर मन्दिरमा पुजाआजा र दर्शन गर्न आएका भक्तजनहरुबाट रु. नौ लाख २७ हजार २३ भेटि संकलन भएको गलेश्वर शिवालय क्षेत्र विकास कोषले जनाएको छ ।
कोषका सदस्य सचिव बलबहादुर खत्रीले साउनको अन्तिम सोमबार भक्तजनले चढाएको रु. एक लाख ७८ हजार ४९० भेटि मंगलबार बिहान गनेर सार्वजनिक गरिएको जानकारी दिनुभयो । यस वर्ष साउन महिनामा पाँच वटा सोमबार परेको थियो ।
पहिलो सोमबार रु. तीन लाख ६५ हजार ६४५, दोस्रो सोमबार रु. ९६ हजार १४१, तेस्रो सोमबार रु. एक लाख ४१ हजार ९५६ र चौथो सोमबार रु. एक लाख ४४ हजार ७९१ भेटि संकलन भएको थियो ।
गलेश्वरमा भक्तजनले चढाउने भेटि पुजा व्यवस्थापन, पूर्वाधार निर्माण, जेष्ठ नागरिक आश्रम, संस्कृति विद्यालय सञ्चालनमा परिचालन हुने गरेको छ । कोषले मेलाको भोलीपल्टनै र अन्य समयमा मासिक रुपमा भेटि गनेर सार्वजनिक गर्दै आएको छ ।
साउन महिनाको सोमबार लाग्ने मेलामा करिब ८० हजार जना भक्तजनले दर्शन र पुजाआजा गरेका गलेश्वर शिवालय क्षेत्र विकास कोषका अध्यक्ष माधवप्रसाद रेग्मीले बताउनुभयो । साउनको हरेक सोमबार निराहार व्रत बसी बिहान सबेरै स्नान गर्ने धार्मिक मान्यता छ । कालीगण्डकी नदीको किनारमा नौ रोपनी क्षेत्रफलमा फैलिएको गलेश्वरमा हरेक वर्षको साउन महिनाको सोमबारका दिन मेला लाग्ने गर्छ ।
यस वर्ष साउनमा पाँच सोमबार परे पनि साउन २ गतेबाट मलमास सुरु भएको थियो । मलमासमा धार्मिक कार्य गर्न नहुने बुझाई, खेतीबाली लगाउने समय, प्रतिकुल मौसमका कारण दोस्रो, तेस्रो र चौथो सोमबार कम भक्तजन आएपनि पहिलो र पाँचौ सोमबार उल्लेख्य मात्रामा भक्तजन आएका कोषका अध्यक्ष रेग्मीले जानकारी दिनुभयो ।
गलेश्वरमा दर्शन र पुजाआजा गरेमा पारिवारिक सुःख, सम्बृद्धि र चाहेको पुरा हुने धार्मिक मान्यता छ । म्याग्दीका साथै पर्वत, बागलुङ, कास्कीका साथै भारतबाट पनि भक्तजन आएका छन् ।
गलेश्वर शिवालय मन्दिरको दर्शन र पुजाआजा, शिवलिङ्गमा बेलपत्र चढाउने र जल अर्पण गर्ने, कालीगण्डकी नदीमा स्नान गर्ने गरिन्छ । हिन्दु तथा बौद्ध धर्मावलम्बीहरुको साझा तिर्थ स्थल मुक्तिनाथको प्रवेशद्धार गलेश्वर पश्चिमको पशुपति नाथको रुपमा चिनिन्छ ।
मेला र पुजाआजालाई सुरक्षित र ब्यवस्थित रुपमा सम्पन्न गराउन स्थानीय प्रशासन, सुरक्षा निकाय, नगरपालिका, क्लब, आमा समूह लगायत सामाजिक र धार्मिक संघ संस्थाले स्वमसेवक परिचालन गरेका थिए ।
